धनगढी– महिला बालबालिका तथा जेष्ठ नागरिक मन्त्री थममाया थापाले निर्मला पन्तको बलात्कारपछि गरिएको हत्याप्रति सरकार संवेदनशील रहेको बताएकी छन्।
महिला बालबालिका तथा जेष्ठ नागरिक मन्त्रालयको आयोजनामा मंगलबार धनगढीमा सुरु भएको प्रदेशस्तरीय लैंगिक हिंसाविरुद्धको १६ दिने अभियान सम्बन्धी कार्यशाला गोष्ठीको उद्घाटन गर्दै मन्त्री थापाले निर्मलाको हत्यारालाई पक्राउ गर्न सरकारले अनुसन्धानलाई गहन बनाएको बताएकी हुन्। ‘कुनै पनि हालतमा निर्मला पन्तका हत्याराहरु छुट्न पाउने छैनन्,’ मन्त्री थापाले भनिन्, ‘निर्मलाका हत्यारालाई कारबाही गर्नका लागि सरकार कटिबद्ध छ। संघीय सरकार घटनाको अनुसन्धानमा लागिरहेको छ।’
उनले प्रमाण नष्ट गराउने खेल भएपछि सरकारले विभिन्न समितिहरु बनाएर बाँकी प्रमाणहरुलाई सुरक्षित बनाएको जानकारी दिइन्। उनले सम्पूर्ण प्रमाणहरु जम्मा गरी घटनाको छानबिन परिणाम नजिक पुगिसकेको दाबी गरिन्। निर्मलाले जस्तै अरुले पनि यस्तो नियति भोग्न नपरोस् र निर्मलाका अभिभावकहरुले दुःख भोग्न नपरोस् भनेर नै सरकारले देशका सात वटै प्रदेशमा लैंगिक हिंसा सम्बन्धी कार्यक्रम आयोजना रहेको मन्त्री थापाको भनाइ थियो। उनले प्रत्येक वडामा हिंसा निर्मुल गर्नका लागि योजना बनाइने पनि खुलाइन्।
विगतमा जिल्ला महिला तथा बालबालिका कार्यालयले महिला हिंसा अन्त्यका लागि महिलाहरुको आयआर्जन बढाउने, जनचेतना फैलाउने लगायतका काम गर्ने गरेको स्मरण गराउँदै मन्त्री थापाले हाल संरचना परिवर्तन भएर स्थानीय तहले त्यो जिम्मेवारी पाएको र स्थानीय तहको नीति, कानुनहरु नबनिसकेकाले समस्या सृजना भएको बतइन्। उनले विगतका महिला तथा बालबालिका कार्यालयहरुले गर्ने काम स्थानीय तहले त्यो भन्दा बढी प्रभावकारी तरिकाले गर्नुपर्नेमा जोड दिइन्।
प्रतिनिधिसभाको महिला तथा सामाजिक समिति सभापति निरुदेवी पालले लैंगिक हिंसा विरुद्धको १६ दिने अभियान वडा–वडामा वर्षैभरि सञ्चालन गर्नुपर्ने मत राखिन्। उनले सुदूरपश्चिममा छाउपडी, देवकी, झुमा प्रथा हालसम्म पनि कायम रहेको र यसलाई समेत अन्त्य गर्नुपर्ने बताइन्। उनले जाँडरक्सीका कारण पनि महिलामाथि हिंसा भइरहेको तर्क गरिन्। सांसद पालले सबै ठाउँबाट जाँडरक्सी अन्त्य भएपछि मात्र महिला हिंसा अन्त्य हुने दाबी गरिन्। उनले स्थानीय जनप्रतिनिधिहरुले हिंसा नपचाए जनताहरुले पनि हिंसाका घटना नपचाउने र समाजबाट हिंसा अन्त्य भएर जाने बताइन्।
सुदूरपश्चिम प्रदेशका आन्तरिक मामिला तथा कानुनमन्त्री प्रकाशबहादुर शाहले छोरी र बुहारी समान हुन् भन्ने भावना पैदा भएमा हिंसा अन्त्य हुने जिकिर गरे। उनले हिंसा अन्त्य अभियान सबैले आफ्नै घरबाट थाल्नुपर्ने सुझाए।
सुदूरपश्चिम प्रदेशका सामाजिक विकास मन्त्री कुष्णराज सुवेदीले सुदूरपश्चिममा रहेका विभिन्न कुरीति, कुप्रथाहरुलाई अन्त्य गर्न आवश्यक रहेको बताए। उनले महिलामाथि हुने हिंसा अन्त्य गर्नका लागि महिलाहरुलाई आर्थिक रुपमा सबल बनाउनु पर्ने र त्यसका लागि आयआर्जन कार्यक्रम सञ्चालन गरी सीपमुलक तालिम दिनुपर्ने मत जाहेर गरे।
गोष्ठीमा सुदूरपश्चिमका प्रतिनिधिसभा तथा प्रदेशसभाका सदस्यहरु, ८८ वटै स्थानीय तहका प्रमुख, उपप्रमुखहरुको सहभागिता रहेको छ। बुधबार सम्पन्न हुने गोष्ठीमा लैंगिक हिंसा अन्त्य गर्नका लागि आवश्यक कार्ययोजना तयार गर्न छलफल हुने छ। स्थानीय, प्रदेश र राष्ट्रियस्तरका कार्ययोजना तथा नीति बनाउनका लागि गोष्ठीबाट आएका निष्कर्षलाई महिला बालबालिका तथा जेष्ठ नागरिक मन्त्रालय र प्रतिनिधिसभालाई सुझावको रुपमा पठाइने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
