काठमाडाैं- परराष्ट्रमन्त्री प्रदिप ज्ञवालीले मानव तस्करीको आरोप लागेकी अस्ट्रेलियाका लागि नेपाली राजदूत लक्की शेर्पामाथि सरकारले छानबिन गरिरहेको बताएका छन्। मन्त्री ज्ञवालीले शेर्पामाथिकाे अाराेप प्रमाणित भएमा कारबाही गरिने प्रतिबद्धता जनाए।
परराष्ट्र मन्त्रालयको वार्षिक प्रतिवेदन सार्वजनिक कार्यक्रममा बोल्दै मन्त्री ज्ञवालीले राजदूत भएर कुनै पनि गैरकानुनी कार्य गरेको फेला परेमा सरकार पछि नहट्ने स्पष्ट पारे।
मन्त्री ज्ञवालीले शेर्पालाई मन्त्रालय झिकाएर छानबिन टोली गठन गरी विस्तृत अनुसन्धान सुरु गरेको बताए।
राजदूत शेर्पा आइतबार देखि सिंहदरबारस्थित परराष्ट्र मन्त्रालयमा हाजिर भएकी हुन्। शेर्पाले आफूमाथि लागेको आरोपका सम्बन्धमा परराष्ट्रमन्त्री र परराष्ट्र सचिव शंकरदास बैरागीसँग स्पष्टीकरण दिइसकेकी छिन्।
मन्त्रालयले उनीमाथि लागेको आरोपको छानबिन गर्न तीन सदस्यीय छानबिन टोली गठन गरेको छ।
छानबिन समितिमा मन्त्रालयका प्रशासन महाशाखा प्रमुख मणि भट्टराई, अस्ट्रेलिया हेर्ने महाशाखा प्रमुख तपस अधिकारी र शिष्टाचार महापाल दीपक अधिकारी छन्।
राजदूत शेर्पाका सवारी चालक वाङ्छु शेर्पाले उनीमाथि मानव तस्करीमा सहयोगी बनेको आरोप लगाएका थिए। उनले आफूसँग पनि शेर्पाले रकम लिएर अस्ट्रेलिया पुर्याएको आरोप लगाएका थिए। लगत्तै प्रमुख प्रतिपक्ष नेपाली कांग्रेसले पत्रकार सम्मेलन नै गरेर सरकारको ध्यानाकर्षण गराएको थियो।
सवारी चालकले राजदूत शेर्पामाथि मानव तस्करी तथा श्रम शोषणको आरोप लगाएपछि परराष्ट्रले उनीमाथि स्पष्टीकरण सोधेको थियो। उनको लिखित स्पष्टीकरण चित्तबुझ्दो नभएको भन्दै मन्त्रालयले समिति नै गठन गरी छानबिनका लागि काठमाडौँ बोलाएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
