काठमाडौं– डकैतीमा संलग्न हुँदै आएका राजन लिम्बू काठमाडौंमा रहेको सुइँको पाएपछि महानगरीय प्रहरी अपराध अनुसन्धान महाशाखाको टोली शुक्रबार दिउँसो रातोपुल एरिया पुग्यो। यसअघि विभिन्न अपराधकर्ममा मुछिएका लिम्बुलाई पक्राउ गर्न जब प्रहरी टोली अघि बढ्यो, उनले उल्टै पेस्तोल तेर्स्याए। प्रतिकारमा प्रहरीले नियन्त्रणमा लिन उनीमाथि गोली चलायो। खुट्टामा गोली लागेका उनी घाइते भए। प्रहरीको पञ्जाबाट उनी उम्कन सकेनन्।
उनले पनि प्रहरीतिर एक राउन्ड गोली प्रहार गरेका थिए।
महाशाखाको टोलीले रातोपुल र कालोपुलबीच पर्ने धोबीखोला करिडोरमा उक्त घटना भएको हो।
प्रहरीले उनको साथबाट एउटा पेस्तोल र ४ राउन्ड गोलीसमेत बरामद गरेको छ। लिम्बुलाई पक्राउ गर्न खोज्दा प्रहरीतर्फ नै फायरिङ गरेपछि खुट्टामा गोली हानेर पक्राउ गर्नुपरेको महानगरीय प्रहरी अपराध महाशाखाका एसएसपी धीरजप्रताप सिंहले जानकारी दिए।
पक्राउ परेका लिम्बू डाका मुद्दामा साढे १० वर्ष जेल बसेर छुटेका व्यक्ति हुन्। पटकपटक डकैती गर्दै फरार लिम्बू काठमाडौं उपत्यकामा सुनचाँदी पसल, आइएमई लुटपाटका २३ वटा घटना र भक्तपुर दत्तात्रय बस्ने माधव नेपालीको हत्यामा संलग्न भएको आरोपमा दोषी ठहर भएर ६ वर्ष जेल बसेका थिए।
६ वर्षको जेलबाट छुटेका लिम्बूको बानी सुध्रनुको साटो झनै आपराधिक बन्दै गयो। लगत्तै उनी डाका गरेकाे अाराेपमा रामेछापमा पक्राउ परेर २ वर्ष जेल बसेका थिए।
त्यसपछि उनले आफ्नो डकैती इलाका परिवर्तन गर्न पूर्वी तराईका जिल्लामा आतंक फैलाउन थालेका थिए।
सुनसरीकै स्थानीय समेत रहेका लिम्बू त्यहाँका ५ वटा आइएमई लुटपाटमा पक्राउ परेका थिए। त्यसबेला झुम्का कारागारमा साढे २ वर्ष जेल जीवन बिताएर छुटेका थिए।
६ महिनाअघि सुनसरीमा आइएमई तथा वित्तीय संस्था लुटपाट गरेपछि उनी प्रहरीको खोजी सूचीमा थिए। अन्तत: प्रहरी लिम्बूलाई पक्राउ गर्न सफल भएको छ।
यस्तो छ लिम्बूको अपराध कर्म
४४ वर्षीय लिम्बू सुनसरी इटहरी उप-महानगरपालिका वडा ५ पचरुखी निवासी हुन्। हाल उनी अनामनगर बस्दै आएका थिए।
५/६ जनाको समूह बनाएर पेस्तोल देखाउँदै लुट्ने गरेको अपराध महाशाखाका डिएसपी रुगम कुँवरले बताए।
उनको समूह दिउँसै आर्थिक कारोबार हुने ठाउँहरूमा जाने र पेस्तोल ताक्दै धम्की दिएर रकम लुटपाट गर्ने गरेको प्रहरीको भनाइ छ। झन्डै १५ वर्षअघिदेखि लुटपाट गर्न थालेका लिम्बूले सयौं पटक लुटिसकेको प्रहरीले बताएको छ।
२०६२ कात्तिक २ गते लिम्बूविरुद्ध महानगरीय प्रहरी परिसरमा थमन गुरुङसहित ६ जनाको समूहमा आएको डाका समूहले हातहतियार लिई धम्की दिएर नगद तथा जिन्सीका समान लुटपाट गरेको भन्दै उजुरी परेको थियो।
त्यसको एक दशकपछि २०७३ फागुन १५ गते झापाको काँकडभिट्टामा डाका गरी फरार भएको भन्दै उनीविरुद्ध उजुरी परेको थियो।
को २८ प ४४४ नम्बरको मोटरसाइकलमा पूर्णबहादुर लुंगेली सहितका व्यक्ति आएर जीवन विकास लुघवित्त संस्थाका कर्मचारीहरूलाई समेत पेस्तोल देखाई १० हजार र उक्त संस्थामा कारोबार गर्न आएका वीरबहादुर प्रधानको ९० हजार रुपैयाँ लुटेर फरार भएका थिए।
त्यस्तै काठमाडौंमा लुटपाट गरेको भन्दै लिम्बूविरुद्ध रवीन राईले २०६३ साउन ३० गते किटान जाहेरीसमेत दिएका थिए। उनले राईले सञ्चालन गरेको गेष्ट हाउसमा पेस्तोल देखाएर साढे ८६ हजार रुपैयाँ लुटेका थिए।
रोवल को–अपरेटिभ लिमिटेडको कार्यालयमा प्रवेश गरी पेस्तोल देखाएर ११ लाख ३० हजार रुपैयाँ लुटेको भन्दै उनीविरुद्ध २०६३ भदौ २० गते काठमाडौं प्रहरीमा उजुरी परेको थियो।
काठमाडौंमै २०६३ असोज २१ गते ३ लाख ६१ हजार १ सय रुपैयाँ लुटपाट गरेको भन्दै लिम्बूविरुद्ध उजुरी परेको थियो।
पछिल्लो समय उनी मंसिर १२ गते इटहरीस्थित एक आइमएईममा कार्यरत व्यक्तिलाई छुरा प्रहार गरेर ३ लाख रुपैयाँ लुटेर फरार भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
