काठमाडौं– प्रधानमन्त्री केपी शर्मा ओली र एसिया प्यासिफिक सम्मेलनमा सहभागी हुन आएका विभिन्न देशका राष्ट्रप्रमुख तथा सरकार प्रमुख बीच भेटवार्ता भएको छ।
प्रधानमन्त्री ओली र इरानका पूर्व उपराष्ट्रपति हसन गाफोरी फार्डबीच शनिबार शिष्टाचार भेटवार्ता भयो। सो अवसरमा नेपाल र इरान भौगोलिकरुपमा नजिक रहेको मित्र राष्ट्र भएकाले एक अर्काको साझा चासो र हितका विषयमा छलफल भएको प्रधानमन्त्रीका परराष्ट्र सल्लाहकार राजन भट्टराईले जानकारी दिए।
साथै, आइक्यापलाई प्रभावकारी बनाउने र सक्रियतापूर्वक अगाडि बढाउने विषयमा पनि छलफल भएको थियो।
आइक्यापमा एसिया प्रशान्त क्षेत्रका दुई सयभन्दा बढी देशका सत्तारुढ र प्रमुख पार्टी सदस्य रहेकाले यसलाई थप प्रभावकारी बनाउन एकआपसमा मिलेर काम गर्ने विषयमा समेत उनीहरुबीच छलफल भएको डा भट्टराईले जानकारी दिए।
यस्तै प्रधानमन्त्री ओलीसँग सामुआका अफिओगा टुइमालिआलिफानो भालेतोआ सुआलौभी द्वितीय र उनका धर्मपत्नीले पनि आजै शिष्टाचार भेटवार्ता गरेका थिए। भेटका अवसरमा जलवायु परिवर्तनले पारेको नकारात्मक प्रभावलाई कसरी कम गर्न सकिन्छ भन्नेबारेमा छलफल भएको थियो।
जलवायु परिवर्तनका कारण नेपालको हिमाली क्षेत्रमा हिउँ पग्लिइरहेको र तटीय क्षेत्रका देशसमेत समस्यामा पर्दै गएकाले त्यसलाई न्यूनीकरण गर्न मिलेर जाने विषयमा महत्वपूर्ण छलफल भएको डा भट्टराईले जानकारी दिए।
नेपाल सरकारले प्रदान गरेको आतिथ्यताको समेत उच्च प्रशंसा गर्दै यहाँको अनुभवलाई आफ्नो देशमा समेत लागू गर्ने भन्दै उनले खुसी व्यक्त गरेका थिए। साथै, संयुक्त राष्ट्रसंघको सदस्यका हैसियतले संयुक्त राष्ट्रसंघको मञ्च तथा अन्य अन्तर्राष्ट्रिय मञ्चमा समान धारणाका साथ प्रस्तुत हुने विषयमा पनि विचार विमर्श भएको थियो।
यस्तै प्रधानमन्त्री ओली र नाउरका राष्ट्रपति बारोना दिभाभेसी बाक्वाबीच पनि आजै शिष्टाचार भेटवार्ता भएको छ। भेटका अवसरमा उनीहरुबीच दुई देशबीच कूटनीतिक सम्बन्ध स्थापना गर्ने, जलवायु परिवर्तन तथा दुई देशका साझा विषयमा समान धारणाका साथ अन्तर्राष्ट्रिय मञ्चमा प्रस्तुत हुने विषयमा कुराकानी भएको थियो।
एशिया प्यासिफिक सम्मेलनको दुई वटा महत्वपूर्ण विषय जलवायु परिवर्तन र अन्तर्राष्ट्रिय शान्ति भएकाले सोही विषयमा नै प्रधानमन्त्री ओलीले भेटवार्ताका क्रममा जानकारी गराएका थिए।
जलवायु परिवर्तनको नकारात्मक प्रभाव कम गर्न अन्तर्राष्ट्रियरुपमा सहयोग तथा ऐक्यबद्धताका विषयमा नै द्विपक्षीय भेटका क्रममा विचार विमर्श भएको प्रधानमन्त्रीका परराष्ट्र सल्लाहकार डा भट्टराईले जानकारी दिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
