काठमाडौं– चिकित्सा शिक्षा सुधारका अभियन्ता प्रा. डा. गोविन्द केसीको स्वास्थ्य अवस्था नाजुक भइरहेको बेला सरकारले उनीसँग वार्ता गर्न मंगलबार ४ सदस्यीय वार्ता समिति गठन गरेको छ।
शिक्षा मन्त्रालयले उच्च तथा प्राविधिक शिक्षा महाशाखाका सहसचिव जयराम अधिकारीको संयोजकत्वमा गठन गरेको समितिमा स्वास्थ्य तथा खाद्य स्वच्छता मन्त्रालयका सहसचिव र चिकित्सा शिक्षा आयोगका सदस्य सचिव र शिक्षा मन्त्रालय उपसचिव मधुप्रसाद घिमिरे प्रतिनिधि सदस्य रहेका छन्।
इलाममा २५औँ आमरण अनसनमा रहेका केसीको स्वास्थ्य अवस्था नाजुक बनेपछि उनलाई सोमबार हेलिकोप्टरमार्फत काठमाडौं ल्याइएको थियो। थप उपचारका लागि उनलाई त्रिवि शिक्षण अस्पतालमा भर्ना गरिएको छ।
अनसनको पाँचौँ दिनदेखि नै उनको स्वास्थ्यमा जटिलता देखिन थालेको थियो। श्वासप्रश्वासमा कठिनाइ भएपछि आइतबार रातिदेखि अक्सिजन दिएर उपचार सुरु गरिएको थियो। स्वास्थ्य अवस्था जोखिमपूर्ण बन्दै गएपछि उपचारमा संलग्न चिकित्सकले सुविधासम्पन्न अस्पतालमा स्थानान्तरण गर्न सिफारिस गरेका थिए।
केसीले गेटामा पूर्वाधारविना एमबीबीएस तथा नर्सिङ कार्यक्रम सञ्चालन गर्ने अनुमति खारेज गर्नुपर्ने, चिकित्सा शिक्षा आयोग र विश्वविद्यालयका पदाधिकारी नियुक्तिमा देखिएको स्वार्थको द्वन्द्वबारे निष्पक्ष छानबिन गर्नुपर्ने, गेटा अस्पताल पूर्ण क्षमतामा सञ्चालन गर्नुपर्ने तथा यसअघि सरकारसँग भएका सहमति कार्यान्वयन गर्नुपर्ने लगायतका ६ बुँदे माग राखेर अनसन सुरु गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
