काठमाडौं–कमल सिंह ऐरीको घातक बलिङको सहायतामा चितवन राइनोजले विराटनगर किङ्सविरुद्ध ८ रनको शानदार जित निकालेको छ ।
यससँगै चितवन राइनोजले सानदार पुनरागमन गर्दै नेपाल प्रिमियर लिग (एनपीएल)मा विजयी सुरुआत गरेको छ।
मंगलबार सम्पन्न खेलमा चितवनले विराटनगर किङ्सलाई ८ रनले हराएको हो। जितसँगै चितवनले २ अंक जोडेको छ।
चितवनले दिएको १५८ रनको लक्ष्य पछ्याएको विराटनगर १९.३ ओभरमा सबै विकेट गुमाउँदै १४९ रनमा समेटियो।
विराटनगरका इमरान शेखले सर्वाधिक ३९ रन बनाए। ३१ बल खेलेका उनले ४ चौका र २ छक्का प्रहार गरे।
आन्द्रे रसलले १७ बलमा १ चौका र छक्कासहित ३३ रन बनाए। लोकेश बम २६ र बसीर अहमद १३ रनमा आउट हुँदा अन्यको ब्याटिङ चल्न सकेन।
चितवनका कमलसिंह ऐरीले सर्वाधिक ४ विकेट लिए। ४ ओभर बलिङ गरेका उनले २६ रन खर्चिए। रिजन ढकालले २ तथा टम टेलर, रञ्जित कुमार, मौसम ढकाल र डान मौउस्लेले समान १ विकेट राखे।
त्यसअघि कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ थालेको चितवनले निर्धारित २० ओभरमा ३ विकेट गुमाउँदै १५७ रन बनाएको थियो।
चितवनका ओपनर डेभिड मलानले सर्वाधिक ७० रन बनाए। ५० बल खेलेका उनले ५ चौका र ५ छक्का प्रहार गरे। कप्तान रवी बोपाराले अविजित ३२ रन बनाए। २६ बल खेलेका उनले १ चौका र २ छक्का प्रहार गरे।
डान मौउस्ले २९ रनमा अविजित रहँदा देव खनालले १२ रन बनाए।
विराटनगरका एन्जेले म्याथ्यू, आन्द्रे रसेल र चारिथ असलंकाले समान १ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
