काठमाडौँ - सरकारले राष्ट्रिय विज्ञान, प्रविधि तथा नवप्रवर्तन परिषद्का ६ सदस्य मनोनयनका लागि योग्य व्यक्तिहरूको नाम सिफारिस गर्न आग्रह गरेको छ ।
विज्ञान, प्रविधि तथा नवप्रवर्तन मन्त्रालयले सूचना जारी गर्दै विज्ञान, प्रविधि, अनुसन्धान तथा नवप्रवर्तन क्षेत्रमा योगदान पुर्याएका योग्य व्यक्तिहरूको नाम सिफारिस गर्न सम्बन्धित व्यक्ति तथा संस्थालाई आग्रह गरेको हो ।
मन्त्रालयका अनुसार नेपालको संविधानको धारा ११४ बमोजिम जारी भएको राष्ट्रिय विज्ञान, प्रविधि तथा नवप्रवर्तन अध्यादेश, २०८३ को दफा ३ मा परिषद्को गठनसम्बन्धी व्यवस्था गरिएको छ। सोही व्यवस्थाअनुसार विज्ञान, प्रविधि, अनुसन्धान तथा नवप्रवर्तनको उच्चस्तरीय नीति निर्माण, कानुनी तथा संस्थागत सुधार, प्राथमिकता निर्धारण, समन्वय, सहजीकरण र स्रोत परिचालनमा परिषद्को भूमिका रहनेछ।
परिषद् प्रधानमन्त्रीको अध्यक्षतामा रहने व्यवस्था छ। विज्ञान तथा प्रविधिसम्बन्धी राष्ट्रिय नीति र प्राथमिकता निर्धारणमा उच्चस्तरीय समन्वय गर्ने उद्देश्यले परिषद्को संरचना निर्धारण गरिएको हो।
परिषद्मा अध्यादेशको दफा ३ को उपदफा (१) को खण्ड (छ) बमोजिम उपाध्यक्षको सिफारिसमा अध्यक्षले ६ जना सदस्य मनोनयन गर्ने व्यवस्था छ । मनोनयन हुने सदस्यमध्ये कम्तीमा दुई जना महिला हुनुपर्नेछ ।
यसरी मनोनयन हुने छ सदस्यमध्ये कम्तीमा दुई जना महिला हुनुपर्ने कानुनी व्यवस्था गरिएको छ। यसले विज्ञान तथा प्रविधिसम्बन्धी उच्चस्तरीय नीति निर्माण प्रक्रियामा महिला सहभागिता सुनिश्चित गर्ने आधार प्रदान गर्नेछ।
मन्त्रालयले सदस्य मनोनयनका लागि सिफारिस गर्न प्रयोगार्थ सम्बन्धित क्षेत्रमा प्रतिष्ठित व्यक्ति तथा संस्थाहरूबाट योग्य र सक्षम व्यक्तिहरूको नाम माग गरेको छ। सिफारिस गरिएका व्यक्तिहरूको व्यक्तिगत विवरण (सीभी) समेत उपलब्ध गराउनुपर्ने सूचनामा उल्लेख छ।
इच्छुक व्यक्ति तथा संस्थाहरूले योग्य व्यक्तिको नाम र व्यक्तिगत विवरण मन्त्रालयको आधिकारिक इमेल मार्फत पठाउन सक्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
