काठमाडौं– असोज ८ गतेदेखि भारी वर्षा हुनसक्ने पूर्वानुमानपछि सरकारले सम्भावित विपद्को जोखिम न्यूनीकरणका लागि पूर्वतयारी तीव्र बनाएको छ। यसैक्रममा केन्द्रीय मनसुन प्रतिकार्य कमाण्ड पोष्ट र ७७ वटै जिल्लाका कमाण्ड पोष्टबीच सम्भावित जोखिम र अपनाउनुपर्ने सावधानीबारे छलफल भएको छ।
गृह सचिव केदारनाथ शर्माको आतिथ्यतामा भएको छलफलमा भारी वर्षाको सम्भावित अवस्था, जोखिममा रहेका जिल्लामा अपनाउनुपर्ने सतर्कता तथा विपद्को सम्भावित अवस्थाबारे सर्वसाधारणलाई समयमै सूचना पुर्याउने विषयमा छलफल भएको हो।
सम्भावित जोखिमलाई ध्यानमा राख्दै आवश्यक परे सवारी आवागमन रोक्ने वा बन्द गर्ने विषयमा समेत छलफल गरिएको छ। विशेषगरी बाढी, पहिरो तथा डुबानको जोखिम रहेका क्षेत्रमा सडक यातायात सुरक्षित बनाउने उपायबारे कमाण्ड पोष्टहरूलाई तयारी अवस्थामा राख्ने विषय उठाइएको थियो।
छलफलमा गृह मन्त्रालय, मौसम विभाग, जल तथा मौसम विज्ञानसँग सम्बन्धित निकाय, बाढी पूर्वानुमान महाशाखा, नेपाली सेना, नेपाल प्रहरी र सशस्त्र प्रहरीका प्रतिनिधिसहित नेपाल पर्यटन बोर्ड तथा नेपाल यातायात व्यवसायी राष्ट्रिय महासंघका प्रतिनिधि सहभागी थिए। काठमाडौं बाहेकका ७६ जिल्लाका कमाण्ड पोष्टका अध्यक्षहरू भने भर्चुअल माध्यमबाट सहभागी भएका थिए।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख डा. धर्मराज उप्रेतीले भारी वर्षाको जोखिम देखिएका क्षेत्रमा विशेष सतर्कता अपनाउन र आवश्यक पूर्वतयारीसहित तयारी अवस्थामा रहन आग्रह गरेका छन्।
भारी वर्षाका कारण बाढी, पहिरो र डुबानसँगै सडक तथा यातायात सेवा प्रभावित हुनसक्ने भएकाले जोखिमयुक्त क्षेत्रको अवस्था निरन्तर अनुगमन गर्ने र आवश्यकताअनुसार तत्काल निर्णय लिने तयारी गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
