काठमाडौं– रसुवाको भोटेकोशी बाढीले क्षतिग्रस्त बनाएको नुवाकोटको बेलकोटगढीस्थित पिमलटार–जागाराम झोलुङ्गे पुल पुनर्निर्माणपछि सञ्चालनमा आएको छ।
बाढीले पुलका लठ्ठा बटारिएपछि सरकारले ती लठ्ठा सोझ्याउनुका साथै ह्यान्ड रेल केबल फेरेको थियो। स्टिल डेक र बिम जडान तथा जाली राख्ने काम पूरा भएपछि पुलबाट आवतजावत पूर्णरूपमा खुला गरिएको हो।
पूर्वाधार विकास मन्त्रालयअन्तर्गत स्थानीय पूर्वाधार विकास विभागले बाढी प्रभावित क्षेत्रमा क्षतिग्रस्त झोलुङ्गे पुलको मर्मत तथा पुनर्निर्माणलाई तीव्रता दिएको जनाएको छ।
विभागका अनुसार धादिङ, नुवाकोट र गोरखाका थप १२ वटा झोलुङ्गे पुलको मर्मत अन्तिम चरणमा पुगेको छ। कालिकास्थान, मालिङ्गा–मझुवाटार दोभान, महेशदोभान, केउरेनी–गहते, चिरौंदी खोला, शीतलबजार–क्युरेनीटार, बेल्खु–भुतिया, बादरे, महादेवस्थान, फोस्रेटार, जिलिङ र धवादीघाटका पुल एक साताभित्र सञ्चालनमा ल्याउने तयारी छ।
यस्तै, बाढीबाट क्षति पुगेका थप सात वटा झोलुङ्गे पुलको मर्मत सुरु भइसकेको छ। ती पुलका लागि आवश्यक स्टिल पार्ट्सको पहिलो चरणको खरिद सकिएको र दोस्रो चरणको खरिदका लागि सम्झौता भइसकेको विभागले जनाएको छ।
पूर्णरूपमा क्षतिग्रस्त ३३ वटा झोलुङ्गे पुल भने नयाँ निर्माण गर्न लागिएको छ। ती पुलका लागि विस्तृत परियोजना प्रतिवेदन (डीपीआर) तयार गर्ने काम अन्तिम चरणमा पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
