काठमाडौं– समस्याग्रस्त तथा ठूलो कारोबार गर्ने सहकारीको नियमन र सुपरिवेक्षणमा नेपाल राष्ट्र बैंक सक्रिय भएको छ । राष्ट्र बैंकको टोलीले हालसम्म १२ सहकारीको स्थलगत निरीक्षण र चारवटाको विशेष निरीक्षण गरिसकेको छ ।
राष्ट्रिय सहकारी प्राधिकरणमा काजमा खटिएको राष्ट्र बैंक उपनिर्देशक गेजा पंगेनी नेतृत्वको १० सदस्यीय टोलीले गत साउनदेखि सहकारीको निरीक्षण गरिरहेको हो । टोलीले पहिलो चरणमा कम्तीमा १५ सहकारीको निरीक्षण गर्ने योजना बनाएको छ ।
राष्ट्र बैंकका अनुसार निरीक्षणका क्रममा केही सहकारीमा एउटै व्यक्तिलाई तोकिएको सीमाभन्दा बढी कर्जा दिने, पर्याप्त धितोबिनै कर्जा प्रवाह गर्ने, सदस्य बनेको तीन महिना नपुग्दै ऋण दिने र पूँजीकोषको गणना नगर्ने जस्ता समस्या भेटिएका छन् ।
पाँचतारा बचत तथा ऋण सहकारी संस्थामा एउटै व्यक्तिलाई प्राथमिक पूँजीको १५ प्रतिशतभन्दा बढी कर्जा प्रवाह गरेको भेटिएको पंगेनीले बताए । त्यस्ता केही कर्जामा धितोसमेत नरहेको र कतिपय कर्जामा धितोले नखाम्ने अवस्था देखिएको उनले जानकारी दिए ।
अख्तियार दुरुपयोग अनुसन्धान आयोगमा परेको उजुरीका आधारमा पाँचताराको तीनवटा कर्जा फाइलसमेत विशेष निरीक्षण गरिएको थियो । ती फाइलमा नियामकीय मापदण्ड पूरा नगरेको देखिएपछि सुधार गर्न निर्देशन दिइएको पंगेनीले बताए ।
निरीक्षणका क्रममा सहकारी सञ्चालक आफैंले कर्जा लिने, कर्जा नतिरे पनि अभिलेख अद्यावधिक नगर्ने, ब्याजदरमा फरक गर्ने तथा पूँजीकोषअनुसार कर्जा प्रवाह नगर्ने जस्ता समस्या पनि भेटिएको राष्ट्र बैंकले जनाएको छ ।
राष्ट्र बैंक टोलीले पाँचतारा साकोस पेप्सीकोला, मिलन बहुउद्देश्यीय सहकारी, भक्तपुर पर्यटन साकोस र स्प्रिचुअल साकोस ललितपुरमा विशेष निरीक्षण गरेको छ ।
टोलीले हाल १३औँ सहकारीको स्थलगत निरीक्षण गरिरहेको छ । पहिलो चरणमा तयार गरिएको सुपरिवेक्षण कार्यविधि तथा देखिएका समस्यासम्बन्धी प्रतिवेदन प्राधिकरणलाई बुझाउने तयारी भइरहेको छ ।
राष्ट्र बैंकले पहिलो चरणमा तीन महिनाका लागि टोली पठाए पनि आवश्यकता रहेसम्म टोली प्राधिकरणमै रहने बताइएको छ । प्राधिकरणका अनुसार राष्ट्र बैंकको टोलीसहित कुल ६० सहकारीको स्थलगत सुपरिवेक्षण गर्ने योजना छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791781329.png)
-1791779517.png)
-1786602170.png)
