काठमाडौं– गायक कुलेन्द्र विश्वकर्मा र देवी घर्तीको स्वरमा नयाँ नृत्यप्रधान गीत ‘जुनतारा’ सार्वजनिक भएको छ। गीतको भिडियोमा प्रकाश सपुत र रेवा गिरीले नृत्य गरेका छन्।
‘जुनतारा’मा आकाश नेपालीको शब्द तथा संगीत रहेको छ भने एकेन्द्र सारा शंकरले निर्देशन तथा कोरियोग्राफी गरेका छन्।
भिडियोमा प्रकाश सपुत र रेवा गिरीको आकर्षक नृत्य देख्न सकिन्छ। गीतको छायांकन दिनेश पराजुलीले गरेका हुन् भने उत्पादन व्यवस्थापन दिनेश दर्जीले गरेका छन्।
‘जुनतारा’को भिडियो आकाश नेपालीको युट्युब च्यानलमार्फत सार्वजनिक गरिएको हो। सार्वजनिक भएदेखि नै गीतको चर्चा बढ्दै गएको निर्माण पक्षले जनाएको छ।
गीतकी मोडल रेवा गिरीले आफू पोखरामा बस्दै आएको र सानैदेखि मोडल बन्ने सपना रहेको बताएकी छन्।
‘म सुन्दर नगरी पोखरामा बस्छु। सानैदेखि नै मेरो मनमा मोडल बन्ने ठूलो सपना थियो। अरूले आफ्नो भविष्यबारे सोच्न सुरु गर्नुभन्दा अगाडिदेखि नै मलाई क्यामेराको अगाडि उभिन, आफ्नो प्रतिभा प्रस्तुत गर्न र नयाँ–नयाँ कुरा सिक्न निकै रुचि लाग्थ्यो। त्यसैले मोडलिङ मेरो लागि केवल एउटा सपना मात्र होइन, आफूलाई चिनाउने र आफ्नो क्षमता प्रस्तुत गर्ने एउटा माध्यम पनि हो,’ उनले भनेकी छन्।
मोडलिङ क्षेत्रमा सफल हुन प्रतिभासँगै निरन्तर मेहनत, अनुशासन, आत्मविश्वास र धैर्य आवश्यक रहेको उनको भनाइ छ। हरेक अवसरबाट नयाँ कुरा सिक्दै आफूलाई अझ राम्रो बनाउने प्रयास गरिरहेको उनले बताएकी छन्।
‘सुरुवातमा साना–साना अवसरबाट अनुभव बटुल्दै भविष्यमा यस क्षेत्रमा आफ्नो छुट्टै पहिचान बनाउने मेरो ठूलो चाहना छ,’ उनले भनेकी छन्।
आफ्नो मोडलिङ यात्रामा बाबुआमाको साथ र समर्थन सबैभन्दा ठूलो शक्ति रहेको गिरीले बताएकी छन्। सानैदेखि आफ्नो सपना सुनाउँदा परिवारले रोक्नुको सट्टा हौसला दिएको र आफू अगाडि बढ्न खोज्दा विश्वास गरेको उनले उल्लेख गरेकी छन्।
‘गल्ती हुँदा सम्झाउनुभयो र कठिन अवस्थामा पनि मेरो मनोबल बढाउनुभयो। उहाँहरूको माया, विश्वास र समर्थनका कारण नै आज म आफ्नो सपना खुलेर पछ्याउने साहस गरिरहेकी छु। मेरो सफलताको यात्रामा उहाँहरूको योगदान म कहिल्यै बिर्सन चाहन्नँ,’ उनले भनेकी छन्।
भविष्यमा केवल मोडलका रूपमा चिनिनुभन्दा आफ्नो मेहनत र प्रतिभामार्फत राम्रो उदाहरण बन्न चाहेको उनले बताएकी छन्। आफूले पाएको अवसरको सम्मान गर्दै नयाँ कुरा सिक्ने, कमजोरी सुधार्ने र हरेक दिन आफूलाई अझ राम्रो बनाउने प्रयास गर्ने उनको भनाइ छ।
‘बाटोमा जति चुनौती आए पनि म आफ्नो सपना सजिलै छोड्न चाहन्नँ। मेरो सपना, मेरो मेहनत र बाबा–ममीको विश्वासलाई साथमा लिएर अगाडि बढ्नु नै मेरो लक्ष्य हो,’ उनले भनेकी छन्।
आफ्नो सपना पूरा गर्ने यात्रामा नयाँ अवसर पाउँदा खुसी र उत्साहित रहेको बताउँदै उनले सही अवसर, निरन्तर मेहनत र परिवारको साथ पाए एक दिन आफ्नो सपना पूरा हुने विश्वास व्यक्त गरेकी छन्।
‘जुनतारा’को पूर्ण भिडियो आकाश नेपालीको युट्युब च्यानलमा हेर्न सकिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
