काठमाडौं– प्रहरीले देशका विभिन्न स्थानबाट अवैध लागूऔषधसहित २० जनालाई पक्राउ गरेको छ। पक्राउ पर्नेहरूबाट ब्राउनसुगर, गाँजा, चरेस तथा नियन्त्रित लागूऔषध डाईजेपाम, फेनारगन र बुप्रेनोर्फिन बरामद भएको प्रहरीले जनाएको छ।
झापाको झापा गाउँपालिका–५ सिमलडाँगीबाट ब्राउनसुगरजस्तो देखिने पदार्थ ४ ग्राम ३० मिलिग्रामसहित बिर्तामोड नगरपालिका–२ सोमबारे बस्ने २५ वर्षीय सनम शेर्मा लिम्बूलाई शनिबार दिउँसो पक्राउ गरिएको छ।
बाँकेको कोहलपुर नगरपालिका–९ भवानीपुरबाट ब्राउनसुगरजस्तो देखिने पदार्थ ८ सय ७० मिलिग्रामसहित प्रेमबहादुर गुरुङसहित तीन जना शनिबार राति पक्राउ परेका छन्। प्रेमबहादुरको घर तलासी गर्दा उक्त पदार्थ फेला परेको प्रहरीले जनाएको छ।
त्यस्तै, कोहलपुर नगरपालिका–१४ पार्वतीपुरबाट ब्राउनसुगरजस्तो देखिने पदार्थ १ सय ७० मिलिग्रामसहित २७ वर्षीय दयाराम हरिजन र ३० वर्षीय भरत दरै पक्राउ परेका छन्।
पर्साको पर्सागढी नगरपालिका–३ बाट ६० वर्षीय गोरे लामालाई करिब ४० किलो गाँजासहित शनिबार राति पक्राउ गरिएको छ। उनको घर तलासी गर्दा उक्त गाँजा फेला परेको प्रहरीले जनाएको छ।
वीरगन्ज महानगरपालिका–१६ बाट ब्राउनसुगरजस्तो देखिने पदार्थ ८ सय ४० मिलिग्रामसहित बारा करैयामाई गाउँपालिका–३ बजनी टोलका २२ वर्षीय सरोजकुमार यादव र २१ वर्षीय विशाल गुप्ता पक्राउ परेका छन्। उनीहरू मधेश प्रदेश ०३–०३७ प ६०३९ नम्बरको मोटरसाइकलमा सवार थिए।
मकवानपुरको हेटौंडा उपमहानगरपालिका–१५ नयाँ बस्तीबाट खैरो हेरोइनजस्तो देखिने पदार्थ ३८ ग्रामसहित तीन जना पक्राउ परेका छन्। पक्राउ पर्नेमा हेटौंडा–१२ का २४ वर्षीय अभिषेक भुलोन तथा मनहरी गाउँपालिका–३ डोढेका २४ वर्षीय आशिष घलान र २७ वर्षीय बिमल सुनार रहेका छन्।
तनहुँको आँबुखैरेनी गाउँपालिका–४ बेनीटारबाट नियन्त्रित लागूऔषध डाईजेपाम, फेनारगन र बुप्रेनोर्फिन २२/२२ एम्पुलसहित पर्वत कुश्मा नगरपालिका–२ का २५ वर्षीय राजकुमार विक पक्राउ परेका छन्। उनी नारायणगढबाट पोखरातर्फ आउँदै गरेको ग.प्र.०१–००१ ख ००८४ नम्बरको ईभी माइक्रोमा सवार थिए।
कास्कीको पोखरा महानगरपालिका–५ मा डेरा गरी बस्ने धादिङ त्रिपुरासुन्दरी गाउँपालिका–२ का ३२ वर्षीय सन्दिप उपाध्यायलाई डाईजेपाम, बुप्रेनोर्फिन र फेनारगन ११/११ एम्पुलसहित पक्राउ गरिएको छ। उनको कोठा तलासी गर्दा उक्त लागूऔषध फेला परेको प्रहरीले जनाएको छ।
रूपन्देहीको बुटवल उपमहानगरपालिका–६ बाट फेनारगन ८ एम्पुल र डाईजेपाम ८ एम्पुलसहित २९ वर्षीय कृष्ण थापा र २३ वर्षीय केशव उपाध्याय पक्राउ परेका छन्।
दाङको घोराही उपमहानगरपालिका–१५ जानकी टोलस्थित एक रेस्टुरेन्टबाट ब्राउनसुगरजस्तो देखिने पदार्थ १ ग्राम २ सय ६० मिलिग्रामसहित रुकुम पश्चिम त्रिवेणी गाउँपालिका–८ का २३ वर्षीय वीरबहादुर खड्का पक्राउ परेका छन्। उनी उक्त रेस्टुरेन्टमा काम गर्ने व्यक्ति रहेको प्रहरीले जनाएको छ।
मोरङको उर्लाबारी नगरपालिका–२ बल्लुचोकबाट ब्राउनसुगरजस्तो देखिने पदार्थ २ ग्राम ८० मिलिग्रामसहित ३१ वर्षीय सुक राज दर्जी र २२ वर्षीय सुदिप धिमाल पक्राउ परेका छन्। प्रहरीले सुक राजको घरबाट १ ग्राम ८० मिलिग्राम र सुदिपको घरबाट १ ग्राम पदार्थ बरामद गरेको जनाएको छ।
कञ्चनपुरको कृष्णपुर नगरपालिका–५ प्रगति टोलस्थित ३७ वर्षीय हिक्मत खड्काको नास्ता पसलबाट चरेसजस्तो देखिने पदार्थ ५१ ग्रामसहित उनलाई पक्राउ गरिएको छ।
प्रहरीका अनुसार पक्राउ परेकाहरूमाथि आवश्यक अनुसन्धान भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
