काठमाडौं– रसुवास्थित भोटेकोशी नदीमा आएको भीषण बाढीबाट प्रभावित नागरिकका लागि फिल्म ‘कार्की साइँला’की अभिनेत्री प्रियना आचार्यले राहत सामग्री सहयोग गरेकी छन्।
बाढीका कारण रसुवा र नुवाकोटसहित प्रभावित क्षेत्रका हजारौँ नागरिकको जनधनमा क्षति पुगेको तथा धेरै परिवार गाँस, बास र कपासको समस्यामा परेको अवस्थामा अभिनेत्री आचार्य व्यक्तिगत पहलमा राहत सामग्री लिएर प्रभावित क्षेत्रमा पुगेकी हुन्।
बाढीपीडितका लागि आवश्यक खाद्यान्नलगायत सामग्री संकलन गरी उनले आफ्नै पहलमा पाँच गाडी राहत सामग्री प्रभावित क्षेत्रतर्फ पठाएकी छन्। राहत अभियानमा सक्रिय रहेकी आचार्यले विपद्को समयमा फिल्मको प्रचारप्रसारभन्दा मानवीय सहयोगलाई प्राथमिकता दिएको बताइन्।
उनले भनिन्, “अहिले फिल्मको प्रचारप्रसारभन्दा पनि बाढीका कारण बिचल्लीमा परेका मानिसहरूलाई राहतको खाँचो छ। त्यसैले अहिले म पूर्ण रूपमा यसै अभियानमा सक्रिय भएर लागेकी छु।”
अभिनेत्री आचार्यको मुख्य भूमिका रहेको फिल्म ‘कार्की साइँला’ आगामी असोज २ गतेदेखि देशभरका सिनेमाघरमा प्रदर्शन हुँदैछ। फिल्म प्रदर्शनमा आउन दुई साता पनि बाँकी नरहेको अवस्थामा प्रचारप्रसारमा व्यस्त हुनुपर्ने भए पनि उनले अहिले मानवीय सहयोगलाई प्राथमिकतामा राखेकी हुन्।
भारी बोकेर जीविकोपार्जन गर्ने ‘कार्की साइँला’को कथामा आधारित फिल्ममा जितु नेपाल र प्रियना आचार्य मुख्य भूमिकामा छन्। फिल्मको गीत ‘लग्यौ परान’ यसअघि नै सार्वजनिक भइसकेको छ। गीतलाई दर्शकले रुचाएका छन् भने जितु नेपाल र प्रियना आचार्यको जोडीले पनि चर्चा बटुलेको छ।
फिल्ममा सुशील पोखरेल, वीरेन्द्र सिंह कुशवाहा, मान्शी शर्मा, मनिल तामाङ, दिप्सन लिम्बू, कमल देवकोटा, रोदा राई, मेनुका आचार्य र गणेश राजभण्डारीलगायत कलाकारको अभिनय रहेको छ।
डम्बर राईको कथामा आधारित फिल्मलाई राजेन्द्र बस्नेतले निर्देशन गरेका हुन्। शंकर धिताल र सबिन अधिकारीले संयुक्त रूपमा पटकथा तथा संवाद तयार पारेका हुन्। फिल्मका निर्माता बालकुमार राई र निर्भिक बञ्जारा तथा कार्यकारी निर्माता अनन्त राई हुन्।
डम्बर राई र नारायण गुरुङले छायाङ्कन गरेको फिल्मलाई सन्देश शाहले सम्पादन तथा सन्दीप डाङ्गीले सह–सम्पादन गरेका छन्। ग्लोबल रिल मोशन पिक्चर्सले पोस्ट प्रोडक्सनको काम गरेको फिल्मको डिजिटल पार्टनर मुभिज डिजिटेनमेन्ट रहेको छ भने वितरण कुबेर फिल्म्सले गर्दैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
