काठमाडौं– काठमाडौं उपत्यकामा एलपी ग्यासको आपूर्ति प्रभावित हुन नदिन नेपाल आयल निगमले वैकल्पिक व्यवस्था मिलाएको छ।
आइतबार त्रिशूली नदीमा आएको भीषण बाढीका कारण धादिङको बेनीघाट रोराङ गाउँपालिका–७ अन्तर्गत पृथ्वी राजमार्गको कृष्णभीर खण्डमा सडक कटान भएपछि राजमार्ग अवरुद्ध भएको छ।
उक्त सडक नखुलेसम्म विभिन्न जिल्लाका ग्यास उद्योगसँग समन्वय गरी वैकल्पिक मार्गबाट काठमाडौंमा ग्यास भित्र्याइने निगमले जनाएको छ।
काठमाडौं तथा आसपासका जिल्लामा एलपी ग्यास बिक्री–वितरण गर्ने उद्योगहरूले बारा, पर्सा, चितवन, मकवानपुर, नवलपरासी तथा आफूलाई पायक पर्ने अन्य जिल्लाका ग्यास उद्योगसँग समन्वय गरी सिलिन्डर रिफिल गर्ने व्यवस्था मिलाइएको छ।
रिफिल गरिएका ग्यास सिलिन्डर ट्रकमा राखेर वैकल्पिक सडक हुँदै काठमाडौं उपत्यका तथा आसपासका जिल्लामा आपूर्ति गरिने निगमले जनाएको छ।
यस्तै, पेट्रोलियम पदार्थ तथा एलपी ग्यासको नियमित आपूर्ति कायम राख्न ट्याङ्कर तथा ट्रकलाई स्थानीय प्रशासनसँग समन्वय गरी वैकल्पिक मार्गबाट काठमाडौं ल्याउने व्यवस्था पनि मिलाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
