काठमाडौं– पाकिस्तानमा हुने १४औँ दक्षिण एसियाली खेलकुद (साग) २०२७ को मिति र खेल संख्या तय भएको छ।
पाकिस्तानको इस्लामाबादमा बसेको दक्षिण एसिया ओलम्पिक काउन्सिल (एसएओसी) को कार्यकारी समितिको बैठकले मिति र खेल टुंगो लगाएको हो।
१४ औँ साग चैत २० देखि २८ गते (सन् २०२७ को अप्रिल ३ देखि ११) सम्म आयोजना हुनेछ। प्रतियोगितामा बंगलादेश, भुटान, भारत, माल्दिभ्स, नेपाल, पाकिस्तान र श्रीलंकाका खेलाडीले सहभागिता जनाउने अपेक्षा गरिएको छ। १४ औं सागको यसअघि मिति तय भएपनि हुन सकेन।
प्रतियोगितामा कुल २८ खेल समावेश गरिने निर्णय भएको एनओसीले जनाएको छ। जसमा एथलेटिक्स, पौडी, आर्चरी, ब्याडमिन्टन, बास्केटबल (३x३ र ५x५), बिलियर्ड्स एन्ड स्नूकर (पुरुष), बक्सिङ, क्रिकेट, फेन्सिङ, फुटबल, गल्फ, ह्यान्डबल/बिच ह्यान्डबल (पुरुष) समावेश गरिने छ।
त्यस्तै जुडो, हक्की, कबड्डी, कराते, रोइङ, रग्बी (पुरुष), सुटिङ, स्क्वास, टेबल टेनिस, तेक्वान्दो, टेनिस, ट्रायथलन, भलिबल/बिच भलिबल (पुरुष), भारोत्तोलन, कुस्ती र उसु रहेका छन्।
‘दक्षिण एसियामा एकता, खेलकुदमा शक्ति’ भन्ने नारासहित आयोजना हुने १४औँ सागले ‘एक भावना, एक क्षेत्र, एक दृष्टिकोण’ को भावनाका साथ दक्षिण एसियाली राष्ट्रका खेल समुदायलाई एकै ठाउँमा ल्याउने लक्ष्य राखेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
