काठमाडौं– पछिल्लो २४ घण्टामा देशका विभिन्न स्थानमा भएका सवारी दुर्घटनामा तीन जनाको मृत्यु भएको छ। नेपाल प्रहरीले सार्वजनिक गरेको विवरणअनुसार सल्यान, दाङ र कैलालीमा भएका छुट्टाछुट्टै दुर्घटनामा तीन जनाको मृत्यु भएको हो।
सल्यानको कपुरकोट गाउँपालिका–३ मुलपानीस्थित राप्ती राजमार्गमा भदौ २ गते बिहान फोर्स गाडी र मोटरसाइकल आपसमा ठोक्किँदा दुई जना गम्भीर घाइते भएका थिए।
लु.प्र.०१–००१ ख १११२ नम्बरको फोर्स गाडी र बा.६८ प २५२८ नम्बरको मोटरसाइकल ठक्कर खाँदा मोटरसाइकल चालक कपुरकोट–६ सिमडाँखोलीका ३४ वर्षीय बेदबहादुर वली र मोटरसाइकलमा सवार ५२ वर्षीय शुकलाल वली घाइते भएका हुन्।
घोराहीस्थित सञ्जीवनी शिक्षण अस्पतालमा उपचाररत बेदबहादुर वलीको भदौ ३ गते बिहान ७:५५ बजे मृत्यु भएको प्रहरीले जनाएको छ। दाङको घोराही उपमहानगरपालिका–७ बेसाहीमा लोड ट्याक्टर र अटो आपसमा ठोक्किँदा एक जनाको मृत्यु भएको छ।
भदौ ३ गते राति करिब ८ बजे सौडियारबाट सर्रातर्फ आउँदै गरेको रा.१ त ३७०९ नम्बरको लोड ट्याक्टर र घोराहीबाट बसन्तपुरतर्फ जाँदै गरेको लु.प्र.०२–००१ ह १९२९ नम्बरको अटो ठोक्किएका थिए।
दुर्घटनामा अटो चालक घोराही–५ बसन्तपुरका ४५ वर्षीय विनोद पौडेल तथा अटोमा सवार ४० वर्षीय खिमराज केसी र ४० वर्षीय तिलक केसी घाइते भएका थिए। पौडेलको उपचारका क्रममा भदौ ४ गते बिहान २:४५ बजे मेडिकल कलेज कोहलपुर, बाँकेमा मृत्यु भएको प्रहरीले जनाएको छ।
कैलालीको भजनी नगरपालिका–४ कुडीस्थित भजनी–सुख्खड सडकखण्डमा मोटरसाइकल दुर्घटना हुँदा चालकको मृत्यु भएको छ। भदौ ३ गते राति करिब ९ बजे धनौराबाट भजनीतर्फ आउँदै गरेको सु.प.प्र.०१–०१२ प १६५१ नम्बरको मोटरसाइकल सडक छेउमा रहेको सालको रुखमा ठोक्किएको थियो।
दुर्घटनामा भजनी–१ मधुवन शिविरका ३० वर्षीय मोटरसाइकल चालक मुकेश चौधरी घाइते भएका थिए। उपचारका लागि प्राथमिक स्वास्थ्य केन्द्र भजनी लगिएका चौधरीलाई चिकित्सकले राति ९:४० बजे मृत घोषणा गरेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
