काठमाडौं - राष्ट्रिय मानव अधिकार आयोगका एक आयुक्त र सचिवबीचको विवाद प्रधानमन्त्री बालेन्द्र शाहसमक्ष पुगेको छ।
आयुक्त मिहिर ठाकुर र सचिव मुरारीप्रसाद खरेलबीच देखिएको विवादका विषयमा आयुक्त ठाकुरले प्रधानमन्त्रीलाई पत्र पठाएका हुन्।
सचिव मुरारीप्रसाद खरेलले सेवा निवृत्त भइसकेपछि पनि आयोगमा काम गरिरहेको भन्दै उनलाई अवकाश दिन माग गर्दै आयुक्त ठाकुरले पत्र लेखेका हुन्। आयुक्त ठाकुरले आयोगका अध्यक्ष तपबहादुर मगरलाई पठाएको पत्रको बोधार्थ प्रधानमन्त्री बालेन्द्र शाहलाई समेत दिएका छन्।
त्यस्तै, पत्रको बोधार्थ आयोगका अन्य आयुक्तसँगै मुख्यसचिव गोविन्द कार्कीलाई पनि दिइएको छ। सचिव खरेलको पाँच वर्षे कार्यकाल पूरा भइसकेको दाबी गर्दै ठाकुरले उनलाई सेवा निवृत्त गर्न माग गरेका हुन्।
ठाकुरले भदौ १ गते पठाएको पत्रमा खरेललाई स्वेच्छाले राजीनामा दिन लगाउन र यदि उनले राजीनामा दिन अस्वीकार गरे आयोगको आकस्मिक बैठक बोलाई सेवा निवृत्त गर्न नेपाल सरकारलाई सिफारिस गर्न माग गरेका छन्।
आयुक्त ठाकुरले २०८३ जेठ १५ गते नै खरेल सेवा निवृत्त भइसकेको दाबी गरेका छन्। सेवा निवृत्त भइसकेका व्यक्तिबाट आयोगका प्रशासनिकलगायतका काम गराउँदा त्यसको वैधानिकतामाथि प्रश्न उठ्ने उनको तर्क छ।
सरकारले २०८० चैत २५ गते खरेललाई आयोगको सचिवमा नियुक्त गर्ने निर्णय गरेको थियो। सचिव नियुक्त हुनुअघि उनी कामु सचिवका रूपमा कार्यरत थिए। खरेलले २०७८ जेठ १६ गतेदेखि कामु सचिवको जिम्मेवारी सम्हाल्दै आएका थिए। कामु सचिवको अवधि समेत गणना गर्दा २०८३ जेठ १५ गते नै पाँच वर्ष पूरा हुने भएकाले सोही मितिमा उनलाई सेवा निवृत्त गराउनुपर्ने आयुक्त ठाकुरको तर्क छ।
यसअघि खरेललाई सचिव नियुक्त गर्ने सरकारको निर्णयविरुद्ध पनि सर्वोच्च अदालतमा रिट परेको थियो। सचिव पदका प्रतिस्पर्धी यज्ञप्रसाद अधिकारीले खरेललाई सचिव नियुक्त गर्ने निर्णय बदर गर्न माग गर्दै रिट दायर गरेका थिए। तर सर्वोच्च अदालतले उनको मागअनुसार आदेश दिन अस्वीकार गरेपछि खरेलको नियुक्तिले निरन्तरता पाएको थियो।
विवादका विषयमा प्रश्न गर्दा आयुक्त ठाकुरले सेवा निवृत्त भइसकेका व्यक्तिले मानव अधिकार आयोगको प्रशासन चलाउन नमिल्ने भएकाले आफूले सोही विषय जानकारी गराएको बताए।
यता, सचिव खरेलले भने आयुक्त ठाकुरले आफूलाई अनावश्यक रूपमा विवादमा तानेको र आफू सेवा निवृत्त नभएको दाबी गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
