काठमाडौं– देशकै ठूलो रिटेल चेन भाटभटेनी सुपरमार्केटले अन्तर्राष्ट्रिय अभ्यासअनुसार आफ्ना स्टोरहरू २४ सै घण्टा सञ्चालन गर्ने तयारी गरेको छ। यसको सुरुवात पाइलट परियोजनाका रूपमा भक्तपुर शाखाबाट बुधबारदेखि गरिने भएको छ।
भाटभटेनीका सञ्चालक कल्याण गुरुङका अनुसार ग्राहकलाई अझ सहज र व्यवस्थित सेवा दिन यो अवधारणा लागू गर्न लागिएको हो। हालसम्म बिहान स्टोर खुलेपछि सामान मिलाउने, स्टक व्यवस्थापन गर्ने र अन्य सञ्चालनसम्बन्धी काम गर्दा ग्राहकलाई असहज हुने गरेको अनुभवपछि ती सबै काम अब रातिको समयमा गरिने योजना बनाइएको उनले बताए।
हाल बिहान ७:३० देखि राति ९ बजेसम्म सञ्चालन हुँदै आएको स्टोर अब २४ घण्टा खुला रहनेछ। रातिको समयमा विशेष टोलीले स्टक व्यवस्थापन, मूल्य ट्यागिङ, सरसफाइ, सामग्री पुनःभरणलगायतका सबै व्यवस्थापकीय काम सम्पन्न गर्नेछ, जसले दिनको समयमा ग्राहकले निर्बाध सेवा लिन सक्नेछन्।
रात्रि ड्युटीका लागि छुट्टै ‘कोर टिम’ गठन गरिएको छ। उक्त टोलीलाई नियमित तलबभन्दा २५ प्रतिशत अतिरिक्त भत्ता, साथै चिया–खाजाको सुविधा उपलब्ध गराइने भाटभटेनीले जनाएको छ।
भक्तपुरमा सफल परीक्षणपछि बौद्ध, टंगाल, कोटेश्वर, पाटनलगायत काठमाडौं उपत्यकाका अन्य शाखामा पनि २४ सै घण्टा सेवा विस्तार गरिनेछ। त्यसपछि पोखरा, बुटवल, नारायणगढलगायत प्रमुख सहरका स्टोरमा पनि यही मोडल लागू गर्ने योजना रहेको गुरुङले जानकारी दिए।
उनका अनुसार रातिको समयमा सामग्री ढुवानी गर्दा ट्राफिक व्यवस्थापन पनि सहज हुनेछ। साना गाडी पटक–पटक प्रयोग गर्नुपर्ने अवस्था हटेर ठूला सवारीमार्फत एकैपटक सामग्री पुर्याउन सकिने भएकाले सञ्चालन खर्च र व्यवस्थापन दुवै प्रभावकारी हुने अपेक्षा गरिएको छ।
भाटभटेनीले देशभर सञ्चालनमा रहेका आफ्ना अधिकांश शाखामा क्रमशः २४/७ सेवा विस्तार गर्दै ग्राहकलाई अन्तर्राष्ट्रिय स्तरको किनमेल अनुभव प्रदान गर्ने लक्ष्य लिएको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
