तेहरान– इरानको परराष्ट्र मन्त्रालयका प्रवक्ता इस्माइल बघाईले अमेरिकासँग अहिले कुनै पनि प्रकारको प्रत्यक्ष वार्ता नभएको बताएका छन् । उनले अमेरिकासँग तत्काल कुनै वार्ता गर्ने योजना पनि नरहेको बताए ।
हर्मुज जलमार्गको व्यवस्थापन र सुरक्षित आवागमनका लागि ओमानसँग चलिरहेको वार्ता भने सकारात्मक रहेकाे उनले बताए । यसअघि अमेरिकी राष्ट्रपति डोनाल्ड ट्रम्पले इरानसँग सम्झौता हुनै लागेको र त्यसका लागि सोमबारदेखि औपचारिक वार्ता सुरु हुने घोषणा गरेका थिए ।
त्यस्तै, इरानी राष्ट्रपति मसूद पेजेस्कियनले अमेरिकालाई गत जुन महिनामा दुई देशबीच हस्ताक्षर भएको अन्तरिम समझदारीपत्रप्रति प्रतिबद्ध रहन आग्रह गरेका थिए । उनले उक्त सम्झौता नै भविष्यमा तेहरानको परराष्ट्र सम्बन्धको मुख्य आधार बन्ने पनि बताएका थिए ।
तर, प्रवक्ता बघाईले अहिलेको अवस्थामा अमेरिकासँग कुनै पनि वार्ता नभएको बताए । उनले पश्चिम एशिया क्षेत्रमा द्वन्द्व र असुरक्षा बढेपछि चीन चिन्तित रहेको बताए । तर, यस द्वन्द्वमा चीनले मध्यस्थकर्ताको भूमिका भने निर्वाह नगरेको स्पष्ट पारे ।
'हाम्रा चिनियाँ साथीहरूले अवस्थालाई थप बिग्रनबाट रोक्न आफ्ना क्षमताहरूको प्रयोग गर्ने प्रयास गरिरहेका छन्,' उनले भने, 'अन्य केही देशहरूजस्तै चीनले पनि सहयोग गरिरहेको छ । तर वार्तामा कुनै नयाँ मध्यस्थकर्ता भने छैन । पाकिस्तानले नै इरान र अमेरिकाबीचका मुद्दाहरूमा मध्यस्थकर्ताको भूमिका निर्वाह गर्दै आएको छ । आवश्यक परेको खण्डमा कतारले पनि सहयोग गर्दै आएको छ ।'
इरानका परराष्ट्र मन्त्रालयका प्रवक्ताका अनुसार अमेरिका र इजरायलको इरानविरुद्धको युद्ध केवल एक देशविरुद्धको मात्र युद्ध होइन ।
'यो सिङ्गो पश्चिम एशिया क्षेत्रका सबै देशहरूको सुरक्षाविरुद्धको युद्ध हो," पत्रकार सम्मेलनमा बघाईले भने, 'यी पाँच महिनामा यस क्षेत्रमा अमेरिकी सैन्य उपस्थितिले असुरक्षा र अस्थिरतालाई थप बढाएको छ । तसर्थ, यस अवस्थालाई थप चर्किनबाट रोक्न यस क्षेत्रका देशहरूले प्रयास गर्नु स्वाभाविक हो ।'
उनले हर्मुज जलमार्ग व्यवस्थापनका विषयमा ओमानसँगको वार्ता भने सकारात्मक रुपमा अघि बढिरहेको बताए । हर्मुज जलमार्गको उत्तरतर्फ इरान र दक्षिणी तटमा ओमान छ ।
'इरान र ओमानबीचको विवादले हर्मुज बन्द भएको होइन । अमेरिका र यहूदी (इजरायल) को सैन्य आक्रमणका कारण हर्मुज समस्यामा परेको हो,' उनले भने । तर, यसलाई सहज र सुरक्षित रुपमा खुलाउने जिम्मा पनि ओमान र इरानकै रहेको उनदले बताए ।
उनले इरानमाथि भइरहेका आक्रमणहरु तत्काल बन्द गर्न अमेरिकासँग माग गरे ।
' किनकि, ओमानसँगको सहमतिले मात्रै हर्मुज खुल्ने अवस्था छैन । यसका लागि इरानमाथि भइरहेका अमेरिकी आक्रमणहरू बन्द हुनुपर्छ । तर, अहिले अमेरिकासँग कुनै पनि प्रकारको प्रत्यक्ष वार्ता भएको छैन । तत्काल आक्रमण बन्द गर्न माग गर्छु ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787673555.png)
-1787673999.jpeg)
-1786602170.png)
-1786513116.png)
