एजेन्सी– इरानका भौतिक संरचनालाई नष्ट गर्नेगरी शनिबारराति हमला गर्ने घोषणा गरेका अमेरिकी राष्ट्रपति डोनाल्ड ट्रम्प फेरि आफ्नो निर्णयबाट पछि हटेका छन् ।
ट्रम्पले इरानमाथि हमला रोक्दै इरान र मध्यपूर्वका अन्य देशले सम्झौताको प्रस्ताव राखेकाले आक्रमण नगरेको दाबी गरेका छन् ।
ट्रम्पले यसअघि पनि दर्जनौँपटक हमला गर्ने धम्की दिँदै सम्झौताको प्रस्ताव आएको भन्दै आक्रमण रोक्ने गरेका थिए । उनले इरान र खाडीका देशले राखेको सम्झौताको प्रस्तावमा तत्काल स्ट्रेट अफ होर्मुज खोल्ने र इरानको परमाणु कार्यक्रम रोक्ने सहमति बनेको दाबी गरेका छन् ।
ट्रम्पले यही अनुरोधलाई स्वीकार गर्दै सम्झौताका लागि तत्काल हमला रोक्ने निर्णय गरेको बताएका छन् । उनले इजरायल पनि यो निर्णयमा अमेरिकाको साथमा रहेको उल्लेख गरेका छन् ।
यता, इरानले भने अमेरिकाले आफ्नो उद्देश्य पूरा गर्न नसकेको दाबी गरेको छ । इरानका कार्यवाहक रक्षामन्त्री माजिद इब्न अल–रेजाले अमेरिकाले आफ्नो उद्देश्य पूरा गर्न नसकेको भन्दै देशको भविष्यका लागि युद्धको तयारी तीव्र बनाउनुपर्नेमा जोड दिएका छन् । उनले स्पेस प्रविधि, गुप्तचरी, कम लगानीका हतियार र रक्षा उद्योगलाई बलियो बनाउनु सरकारको प्राथमिकता भएको उल्लेख गरेका छन् ।
उता, एक्सियोसको रिपोर्टअनुसार साउदी अरबका युवराज मोहम्मद बिन सलमानले शनिबार अमेरिकी राष्ट्रपति ट्रम्पसँग फोन कुराकानी गरेका थिए । जसमा उनले इरानविरुद्ध हुने सम्भावित ठूलो सैन्य हमलालाई लिएर चिन्ता व्यक्त गर्दै संयमता अपनाउन आग्रह गरेका थिए । उनले इरानमाथिको हमला तत्कालका लागि रोक्न गरेको आग्रहअनुसार नै हमला रोकेका हुन् ।
इरानले अमेरिकाले इरानका भौतिक संरचनालाई निशाना बनाएमा खाडीसहित अमेरिकालाई साथ दिने सबै देशलाई निशाना बनाउने धम्की दिएको थियो । इरानी सांसद इब्राहिम रेजाईले इरानमाथि हमला भएमा अबको जवाफ पर्सियन खाडीमा मात्रै सीमित नहुने भन्दै सबै सैन्य अड्डालाई निशाना बनाउने र अमेरिकालाई बेस उपलब्ध गराउने कुनै पनि देश सुरक्षित नहुने चेतावनी दिएका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
