काठमाडौं- प्रतिनिधिसभा र प्रदेशसभा निर्वाचनका लागि राजनीतिक दलहरुले आइतबार समानुपातिक निर्वाचन प्रणाली अन्तर्गतका उम्मेदवारको बन्द सूची बुझाउनुपर्नेछ।
मंसिर १० र २१ गते दुई चरणमा निर्वाचन हुने भए पनि दलहरुले दुबै चरणको लागि आजै उम्मेदवारको बन्द सूची पेश गर्नुपर्नेछ।
समानुपातिक निर्वाचन प्रणाली अन्तर्गत प्रतिनिधिसभाको लागि १ सय १० र प्रदेशसभाका लागि २२० जना चयन हुनेछन् । दलहरुले बन्द सूची पेश गर्दा ५० प्रतिशत महिला अनिवार्य समेट्नुपर्छ । यस्तै, १३.८ प्रतिशत दलित, २८ प्रतिशत आदिवासी जनजाति, ३१.२ खस आर्य, १५.३ मधेसी, ६.६ थारु र ४.४ प्रतिशत मुस्लिम सिफारिस गर्नुपर्नेछ।
समानुपातिक निर्वाचनका लागि ८८ दलले निर्वाचन चिह्न प्राप्त गरेका छन् । दलहरु प्रतिशत मिलाउन अझै छलफलमा छन् ।
'आयोगले जातीय कलस्टर मिलाएर सूची पेश गर्न भनेकाले हामी अझै छलफलमा छौं', कांग्रेस नेता आनन्दप्रसाद ढुंगानाले भने।
नेकपा एमाले पनि छलफलमा व्यस्त छ । आन्तरिक मापदण्ड अनुसार सूची तयार भए पनि आयोगमा बुझाउने सूची तयार गर्न पार्टी छलफलमा रहेको सचिव योगेश भट्टराईले नेपाल लाइभलाई बताए।
माओवादी केन्द्रले शनिबार समानुपातिक उम्मेदवारतर्फको बन्दसूचीबारे छलफल गरे पनि सहमति जुट्न सकेको थिएन । आजै टुंगो लगाएर आयोगलाई बुझाइने सचिव टोपबहादुर रायमाझीले बताए।
निर्वाचन आयोगले समानुपातिक निर्वाचन प्रणालीमा पर्ने उम्मेदवारका लागि निर्वाचन खर्च समेत तोकिदिएको छ । आयोगको मापदण्ड अनुसार उम्मेदवारले अधिकतम दुई लाख रुपैयाँसम्म खर्च गर्न पाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
