काठमाडौँ –अर्थमन्त्री डा. स्वर्णिम वाग्लेले पोखरा तथा गौतमबुद्ध अन्तर्राष्ट्रिय विमानस्थलको प्रभावकारी सञ्चालनका लागि सरकारले आन्तरिक तयारीसँगै कूटनीतिक तहमा पनि सक्रिय पहल गरिरहेको बताएका छन् ।
नेपाल चेम्बर अफ कमर्सद्वारा आयोजित बजेटसम्बन्धी अन्तरक्रियामा बोल्दै अर्थमन्त्री वाग्लेले दुवै अन्तर्राष्ट्रिय विमानस्थललाई पूर्ण क्षमतामा सञ्चालनमा ल्याउनु सरकारको प्रमुख प्राथमिकतामध्ये एक रहेको बताए ।
उनका अनुसार विमानस्थल सञ्चालन, अन्तर्राष्ट्रिय हवाई पहुँच विस्तार, हवाई मार्ग व्यवस्थापन तथा क्षेत्रीय कनेक्टिभिटीसँग सम्बन्धित विषयहरूलाई नेपालले छिमेकी मुलुकहरूसँगको संवादमा महत्वपूर्ण एजेन्डाका रूपमा उठाउँदै आएको छ ।
अर्थमन्त्री वाग्लेले परराष्ट्रमन्त्री शिशिर खनालको हालैका भारत तथा चीन भ्रमणका क्रममा पनि हवाई उड्डयन क्षेत्रसँग सम्बन्धित विषयहरू छलफलको प्राथमिक सूचीमा रहेको जानकारी दिए । विमानस्थलको उपयोगिता बढाउने, अन्तर्राष्ट्रिय उडान आकर्षित गर्ने तथा व्यवस्थापन सुधारका विषयमा विभिन्न तहमा संवाद भइरहेको उनले बताए ।
दुवै विमानस्थल निर्माणका लागि लिइएको ऋणको दायित्व राज्यले वहन गरिरहेकाले तिनलाई सञ्चालनयोग्य र आर्थिक रूपमा प्रभावकारी बनाउनु सरकारका लागि आवश्यक रहेको मन्त्री वाग्लेको भनाइ थियो । उनले विमानस्थलबाट अपेक्षित प्रतिफल प्राप्त गर्न सम्बन्धित सबै पक्षसँग समन्वय गरेर काम भइरहेको बताए ।
सरकारले आर्थिक कूटनीतिलाई प्राथमिकतामा राख्दै हवाई उड्डयन, ऊर्जा, सडक पूर्वाधारलगायत क्षेत्रसँग सम्बन्धित विषयमा अन्तर्राष्ट्रिय तहमा निरन्तर पहल गरिरहेको पनि उनले उल्लेख गरे ।
अर्थमन्त्री वाग्लेले विगतमा पर्याप्त रूपमा सम्बोधन हुन नसकेका विषयमा समेत वर्तमान सरकारले सक्रिय संवाद र वार्तामार्फत समाधान खोज्ने प्रयास गरिरहेको दाबी गरे ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
