काठमाडौँ– लिपुलेक हुँदै कैलाश मानसरोवर यात्रा पुन: सञ्चालन गरिएको सन्दर्भमा नेपालले उठाएको सीमा सम्बन्धी विषयमा भारतले आफ्नो आधिकारिक धारणा सार्वजनिक गरेको छ।
भारतको विदेश मन्त्रालयका आधिकारिक प्रवक्ता रनधीर जैसवालले नेपालको परराष्ट्र मन्त्रालयले गरेको दाबीबारे प्रतिक्रिया दिँदै लिपुलेक पास लामो समयदेखि प्रयोगमा रहेको मार्ग भएको बताएका छन्।
उनले सामाजिक सञ्जालमार्फत सार्वजनिक गरेको अभिव्यक्तिमा भनेका छन्, “यस विषयमा भारतको धारणा सधैं स्पष्ट र स्थिर छ। लिपुलेक पास सन् १९५४ देखि कैलाश मानसरोवर यात्राका लागि प्रयोग हुँदै आएको मार्ग हो र यस मार्गबाट यात्रा दशकौँदेखि सञ्चालन हुँदै आएको छ। यो कुनै नयाँ विकास होइन।”
सीमा सम्बन्धी दाबीबारे उनले भारतको धारणा दोहोर्याउँदै भनेका छन्, “यस्ता दाबी न त उचित छन् न त ऐतिहासिक तथ्य र प्रमाणमा आधारित छन् भन्ने भारतको स्थायी धारणा रहँदै आएको छ। एकपक्षीय रूपमा गरिएको कृत्रिम भौगोलिक विस्तारको दाबी अस्वीकार्य छ।”
भारतले नेपालसँगको द्विपक्षीय सम्बन्धका विषयमा संवादलाई प्राथमिकता दिने उल्लेख गर्दै प्रवक्ता जैसवालले भनेका छन्, “दुवै देशबीचका सहमतिका आधारमा बाँकी रहेका सीमा सम्बन्धी विषयहरू समेत कूटनीतिक संवादमार्फत समाधान गर्न भारत सधैं खुला छ।”
यसअघि नेपालले लिपुलेक क्षेत्र समेटिएको मार्गबाट कैलाश मानसरोवर यात्रा सञ्चालन गरिएको विषयलाई लिएर सीमा सम्बन्धी चासो व्यक्त गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787021778.jpeg)
-1786602170.png)
-1786513116.png)
