वासिङ्टन डीसीको एक होटलमा आयोजित ह्वाइट हाउस संवाददाताहरूको रात्रिभोज (डिनर) मा गोली चलेको आवाज सुनिएपछि अराजकता फैलिएको छ।
स्थानीय समय अनुसार शनिबार राति वासिङ्टन हिल्टन बलरूममा आयोजित कार्यक्रममा गोली चलेको आवाज आएपछि गोप्य सेवा (सेक्रेट सर्भिस) का एजेन्टहरूले अमेरिकी राष्ट्रपति डोनाल्ड ट्रम्प र प्रथम महिला मेलानिया ट्रम्पलाई तुरुन्तै त्यहाँबाट बाहिर निकालेका हुन्।
कार्यक्रम भित्रको भिडियोमा सहभागीहरू टेबलमुनि हाम फालेको र कोठाभरि आतंक फैलिएपछि लुकेको देखिन्छ। फक्स न्यूजका जोन रोबर्ट्सले बलरूमबाट गोली चलाइएको र संदिग्ध बन्दुकधारीमाथि गोप्य सेवाले गोली चलाएको सुनेको बताए। यस्तै, फक्स न्यूजका प्रस्तोता ब्रेट बायरले पनि आफूले गोली चलेको सुनेको तर ती गोली बलरूम भित्रबाट आएको जस्तो नदेखिएको उल्लेख गरे।
ह्वाइट हाउसका अधिकारीहरूले राष्ट्रपति ट्रम्प, प्रथम महिला र क्यारोलिन लेभिट सुरक्षित रहेको जानकारी दिएका छन्। ट्रम्पलाई सुरक्षाकर्मीले कोठाबाट बाहिर निकाल्दै गर्दा राइफल बोकेका सुरक्षाकर्मीहरू मञ्चमा देखा परेका थिए। सोही कार्यक्रममा सहभागी उपराष्ट्रपति जेडी भान्स र मन्त्रिपरिषद्का अन्य सदस्यहरूलाई पनि सुरक्षाकर्मीले हतार-हतार बाहिर निकालेका थिए।
प्रशासनका एक अधिकारीका अनुसार मन्त्रिपरिषद् सदस्यहरू सबै सकुशल छन्। सीएनएनसँग कुरा गर्दै एक स्रोतले ट्रम्प सुरक्षित रहेको पुष्टि गरेको छ। रात्रिभोजको फुटेजमा धेरै सुरक्षा एजेन्टहरू टेबलको भीडबाट दौडिरहेको र विशिष्ट व्यक्तिहरूलाई हटाउँदै गरेको देखिएको छ।
बहालवाला राष्ट्रपतिको रूपमा ट्रम्पले भाग लिएको यो पहिलो संवाददाताहरूको रात्रिभोज थियो, जहाँ उनले सम्बोधन गर्ने तालिका थियो। घटना के कारणले भयो र कसले गोली चलायो भन्ने विषयमा अझै स्पष्ट जानकारी आउन सकेको छैन। सुरक्षा निकायले यसबारे अनुसन्धान सुरु गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
