विराटनगर – मनमोहन प्राविधिक विश्वविद्यालयमा चिनियाँ राष्ट्रपति सी जिनपिङको पुस्तक ‘द गर्भनेन्स अफ चाइना’ जलाइएको घटनाबारे छानबिन गर्न समिति गठन गरिएको छ ।
गृह मन्त्रालयको निर्देशन बमोजिम मोरङका सहायक प्रमुख जिल्ला अधिकारी सरोज कोइरालाको संयोजकत्वमा पाँच सदस्यीय छानबिन समिति बनाएको हो ।
समितिमा जिल्ला प्रहरी कार्यालय मोरङका डीएसपी, प्रदेश आन्तरिक मामिला तथा कानुन मन्त्रालयका प्रतिनिधि, सरकारी वकिल कार्यालयका प्रतिनिधि र शिक्षा इकाइका प्रतिनिधि सदस्य छन् ।
घटनाबारे आवश्यक छानबिन गरी प्रतिवेदन पेश गर्न समितिलाई १५ दिनको समयसीमा तोकिएको मोरङका प्रमुख जिल्ला अधिकारी युवराज कट्टेलले जानकारी दिए । उनले समितिले आजैदेखि काम सुरु गरेको जानकारी दिँदै सबै कुरा समितिले प्रतिवेदन दिएपछि थाहा हुने बताए ।
सफाइका क्रममा पुस्तकका केही प्रति जलेको भिडिओ सार्वजनिक भएपछि चिनियाँ दूतावासले चासो राख्दै परराष्ट्र मन्त्रालयमार्फत लिखित ध्यानाकर्षण गराएको थियो । त्यसलगत्तै मन्त्रालयले चासो दिएको हो ।
यसैबीच मनमोहन प्राविधिक विश्वविद्यालयले भने सामाजिक सञ्जालमा आफ्नो संस्थासँग जोडेर सार्वजनिक भएका तस्वीर तथा सूचनाहरूप्रति गम्भीर ध्यानाकर्षण भएको जनाएको छ ।
विश्वविद्यालयले एक प्रेस विज्ञप्ति जारी गर्दै स्कुल अफ इन्जिनियरिङ अन्तर्गत सिभिल इन्जिनियरिङ विभागका नयाँ ल्याबहरू स्थापना गर्नका लागि पुराना वर्कशप खाली गर्ने क्रममा केही सामग्री व्यवस्थापन गरिएको स्पष्ट पारेको हो ।
विगत लामो समयदेखि प्रयोगमा नआएका, कवाडी अवस्थामा रहेका सामान र पूर्ण रूपमा मक्किएका तथा धमिरा लागेका केही पुस्तकहरू मात्र सरसफाइका क्रममा नष्ट भएको विश्वविद्यालयले जनाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
