काठमाडौं– बेलायतमा रहयेको अमेरिकी सैन्य अड्डाबाट इरानमा हमला गर्नका लागि प्रधानमन्त्री केयर स्टार्मरले अनुमति दिएका छन्।
आइतबार सामाजिक सञ्जालमार्फत बेलायती प्रधानमन्त्री स्टार्मरले इरानका मिसाइल प्रक्षेपण स्थलहरूलाई लक्ष्य गरी कारबाहीका लागि आफ्नो देशमा रहेको अमेरिकी सैन्य अड्डा प्रयोग गर्न अनुमति दिने निर्णय भएको बताएका हुन्।
प्रधानमन्त्री स्टार्मरले उक्त कदमलाई विशेष र सीमित रक्षात्मक उद्धेश्यका लागि मात्रै भनेका छन्।
उनले यो निर्णयबाट इरानले क्षेत्रभरि मिसाइल प्रहार गरेर निर्दोष सर्वसाधारणको ज्यान लिने र बेलायती नागरिकको सुरक्षामा जोखिम पुर्याउने तथा युद्धमा प्रत्यक्ष संलग्न नभएका देशहरूलाई निशाना बनाउने सम्भावनालाई रोक्नका लागि भनेका छन्।
‘इरानले क्षेत्रभर मिसाइल प्रहार गरी निर्दोष नागरिकको हत्या गर्न नपाओस् भन्ने उद्देश्यले हामीले यो अनुमति दिएका हौँ,’ स्टार्मरले भने।
गत महिना अमेरिकी राष्ट्रपति डोनाल्ड ट्रम्पले बेलायतप्रति सार्वजनिक असन्तुष्टि जनाएका थिए। बेलायती अधिकारीहरूले इरानमाथि सम्भावित पूर्व–आक्रमणका लागि अमेरिकी सेनालाई आरएएफ फेयरफोर्ड (इङ्ग्ल्याण्ड) र हिन्द महासागरस्थित संयुक्त अमेरिकी–बेलायती अड्डा डिएगो गार्सिया प्रयोग गर्न अस्वीकार गरेपछि ट्रम्पले स्टार्मरको आलोचना गरेका थिए।
उनले ती अड्डाको प्रयोगमा लगाइएका प्रतिबन्धहरूले अमेरिकी सैन्य योजना प्रभावित हुन सक्ने बताएका थिए।
यद्यपि बेलायतले इरानविरुद्ध प्रत्यक्ष आक्रमणमा सहभागिता जनाएको छैन। शनिबारदेखि बेलायती सेनाले उत्तरी इराक र कतारतर्फ लक्षित इरानी ड्रोनहरू अवरोध गर्ने जस्ता रक्षात्मक कारबाही गरेको जनाएको छ।
स्टार्मरले बेलायत इरानी शासन विरुद्धको आक्रामक सैन्य कारबाहीमा प्रत्यक्ष संलग्न नहुने स्पष्ट पारे।
ग्लोस्टरशायरस्थित आरएएफ फेयरफोर्ड नाम बेलायती भए पनि दीर्घकालीन रक्षा सम्झौताअन्तर्गत उक्त अड्डा अमेरिकी वायुसेनाले सञ्चालन गर्दै आएको छ।
तर बेलायती भूमिबाट कुनै पनि युद्धसम्बन्धी अभियान सञ्चालन गर्न लन्डनको स्पष्ट स्वीकृति आवश्यक पर्छ, जसले अन्तिम निर्णयाधिकार बेलायत सरकारसँग रहने सुनिश्चित गर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772429987-1772433038.jpg)
-1764146706.png)
