एजेन्सी– लेबननस्थित इरान समर्थित समूह हिजबुल्लाहले इसराइलमा मिसाइल र ड्रोनले हमला गरेको छ।
इसराइलले अमेरिकासँग मिलेर इरानी सर्वोच्च नेता आयातोल्लाह अली खामेनीको हत्या गरेपछि त्यसको बदला भन्दै आइतबार हिजबुल्लाहले लेबननबाट इसराइलको उत्तरी क्षेत्रमा हमला गरेको हो।
इरानले लेबननमा हिजबुल्लाह, गजामा हमास, यमनमा हुथी र इराकमा विभिन्न समूहलाई हतियार र सैन्य तालिम दिएर इसराइलमाथि आक्रमण गराउँदै आएको छ।
हिजबुल्लाहले गएराति हैफाको दक्षिणमा रहेको इसराइली सेनाको मिस्मार हा–कार्मेल मिसाइल रक्षा केन्द्रलाई लक्षित गर्दै मिसाइल र ड्रोन प्रहार गरिएको अल–मनार टेलिभिजनमार्फत जारी वक्तव्यमा जनाएको छ।
इसराइली रक्षा बल (आईडीएफ) ले भने लेबननबाट प्रहार गरिएको हमला निस्तेज पारिएको र अन्य केही हवाई हतियारहरू खुला क्षेत्रमा खसालेको जनाएको छ।
आक्रमणबाट कुनै मानवीय क्षति वा भौतिक नोक्सानी नभएको आईडीएफको भनाइ छ। उत्तरी इसराइलका विभिन्न क्षेत्रमा ड्रोन साइरन बजाइएको थियो।
यदि हिजबुल्लाह नै जिम्मेवार ठहरिएमा यो सन् २०२४ नोभेम्बरमा अमेरिका–मध्यस्थतामा भएको युद्धविराम सम्झौतापछि समूहद्वारा गरिएको पहिलो रकेट आक्रमण हुनेछ।
यसैबीच, इसराइली सेनाले सोमबार बिहान बेरुत क्षेत्रमा हिजबुल्लाहका वरिष्ठ लडाकुहरू लाई लक्षित गर्दै हवाई आक्रमण गरेको पुष्टि गरेको छ। दक्षिणी लेबननमा पनि सोमबार बिहान इसराइलले हमला गरेको छ।
लेबननको सरकारी समाचार संस्था नेशनल न्युज एजेन्सीका अनुसार बेरुतको दक्षिणी उपनगर दहियेसहित विभिन्न क्षेत्रमा इसराइली हवाई आक्रमणपछि ठूलो संख्यामा सर्वसाधारण विस्थापित भइरहेका छन्। दहिये क्षेत्र हिजबुल्लाहको बलियो प्रभाव क्षेत्र मानिन्छ।
लेबननका प्रधानमन्त्री नवाफ सलामले इसराइली आक्रमणको निन्दा गरेका छन्।
‘देशलाई नयाँ द्वन्द्वमा तान्न हामी अनुमति दिने छैनौँ। जिम्मेवार पक्षलाई रोक्न र लेबननी जनताको सुरक्षा गर्न आवश्यक सबै कदम चालिनेछ,’ उनले सामाजिक सञ्जाल एक्समा लेखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
