काठमाडौँ– प्रधानमन्त्री सुशीला कार्कीले नवयुवाको असन्तोषलाई दमन गरेर नभई सम्बोधन गरे मात्र राष्ट्र अघि बढ्नसक्ने बताएकी छिन्।
७६ औँ राष्ट्रिय प्रजातन्त्र दिवसको अवसरमा बिहीबार टुँडिखेलमा आयोजित विशेष समारोहमा उनले ‘मुलुकमा बारम्बार किन आन्दोलन भइरहन्छ’ भन्ने विषयमा निर्मम आत्मसमीक्षा गर्नुपर्ने बताइन्।
उनले २००७ सालको क्रान्तिलाई आधुनिक जग मान्दै त्यसयता भएका राजनीतिक परिवर्तनले जनताको जीवनस्तरमा तात्त्विक भिन्नता ल्याउन नसकेको तीतो यथार्थ रहेको तर्क गरिन्। भदौ २३ र २४ मा भएको युवाको आन्दोलनलाई उनले ‘असफल संरचनामाथिको प्रश्न’ को रूपमा चित्रण गरिन्
‘प्रजातन्त्र दिवस मनाइरहँदा हामीले आत्मसमीक्षा गर्नैपर्छ कि, किन २००७ को उपलब्धि २०१७ मा खोसियो? किन २०३६, २०४६, २०६२- ६३ र फेरि २०८२ मा पनि सडकमा जनता उत्रिनुपर्यो? किन यस पटक कलिला जेन जी युवाले पनि गोलीको परवाह नगरी आवाज उठाउनुपर्यो?’, उनले भनिन्, ‘हामीले लोकतन्त्रको नारा भट्यायौँ, संविधानमा अक्षरका सुन्दर बाँकी सजायौँ तर त्यसको लोकतान्त्रिक व्यवहार र संस्थागत गरेनौँ। गर्ने चाहेनौँ । सिद्धान्तमा लोकतन्त्र आयो तर व्यवहारमा विभेदलाई नै प्रश्रय दिइरह्यौँ। संविधानमा समानता लेख्यौँ तर संरचनामा असमानतालाई नै जोगाइरह्यौँ।’
प्रधानन्त्री कार्कीले भदौ २३ र २४ मा जेन-जी युवाहरूको अगुवाइमा भएको आन्दोलन जनताका गुनासा सुन्न असफल संरचनामाथिको प्रश्नरहेको बताइन्। यो आन्दोलनले उठाएका भ्रष्टाचार, नातावाद र विभेद अन्त्यका माग जायज रहेको भन्दै प्रधानमन्त्री कार्कीले राज्य अब उदार मात्र नभई विनयशील हुनुपर्ने बताइन्।
उनले युवा पलायनलाई केवल अवसरको खोजी मात्र नभई यहाँको दण्डहीनता र सीमित वर्गको हालिमुहालीप्रतिको वितृष्णाको उपज भएको बताइन्। उनले प्रक्रियाको नाममा जनतालाई अल्झाउने कर्मचारीतन्त्र र राजनीतिक नेतृत्वको रवैयालाई ‘बेथिति’ को संज्ञा दिँदै नतिजामुखी काम गर्न निर्देशन दिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771484611.png)
-1764146706.png)
