कञ्चनपुर– एक सातादेखि साँझ नपर्दै जंगली हात्तीको झुण्ड खेतमा छिर्न थालेपछि कञ्चनपुरको शुक्लाफाँटा नगरपालिका–१ खजुवापट्टिका बासिन्दा अनिदोमै रात बिताउन बाध्य भएका छन्। पाकेर काट्नै लागेको धानबाली जोगाउनका लागि स्थानीय बासिन्दा अनिदोमै रात काट्न थालेका हुन्।
_x000D_
_x000D_
पुरै गाउँका बासिन्दाले होहल्ला गर्दै पटका पड्काउने, ढोलक बजाउने गरे पनि हात्ती खेतमा छिरेर धानबाली सखाप पार्ने गरेको छ।
_x000D_
_x000D_
रातभर अनिँदो रहने बासिन्दा दिउँसभर सुत्ने गरेका छन्। पटाका पड्काउने र आगो देखेर तर्सेर भाग्ने गरेका हात्तीको झुण्ड तर्सनसमेत छाडेको स्थानीय पल्टु डगौराले भने, ‘धान खाएर आफैं हात्तीको झुण्ड बिहानीपख शुक्लाफाँटा निकुञ्ज र सामुदायिक वनतर्फ लाग्ने गरेको छ।’
_x000D_
_x000D_
छावासहित २० भन्दा बढी हात्तीको झुण्ड भगाउनका लागि रातभर स्थानीयबासी छिमेकी गाउँका बासिन्दाको सहयोगमा लाग्ने गरेका छन्। जति गरे पनि हात्तीको झुण्ड नभाग्ने गरेको सोनु चौधरीले बताए।
_x000D_
_x000D_
हालसम्म हात्तीको झुण्डले रानीपुर र खजुवापट्टिमा मात्रै दश बिघा बढी क्षेत्रफलमा लगाएको धानबाली नोक्सानी गरेको छ। हात्तीको झुण्ड दुई भागमा बाँडिएर रहेकाले स्थानीय किसानले बढी क्षति व्यहोर्नुपरेको छ।
_x000D_
_x000D_
दुईतर्फबाट घेरेर हात्तीको झुण्डले धानबाली खाने गरेको छ। एउटा झुण्ड शुक्लाफाँटा राष्ट्रिय निकुञ्जबाट बस्ती छिर्ने र अर्को झुण्ड नजिकैको सामुदायिक वनबाट बस्तीमा आउने गरेको छ।
_x000D_
_x000D_
एकै ठाउँमा हात्तीको झुण्ड भए भगाउन सजिलो हुन्थ्यो, सागर धामीले भने, ‘दुईतर्फबाट आउने भएकाले धानबालीमा बढी क्षति गरेको छ।’
_x000D_
_x000D_
दुई दिनअघि मात्रै हात्तीको झुण्डले वैशाख र गणेशपुरका सात बढी बासिन्दाको घरसमेत भत्काएको थियो। घर भत्काएका परिवार छिमेकीको शरणमा बस्न बाध्य छन्। घरभित्र राखेको अन्नसमेत हात्तीले खाएपछि हात्ती पीडित परिवारको बिजोग भएको छ।
_x000D_
_x000D_
धनवीरे सार्कीले भने, ‘घर भत्कायो, भित्र राखेको अन्न सबै खायो, कपडा सबै च्यातचुत पार्यो। भाँडाकुडा कामै नलाग्ने बनायो। आउनै लागेको दसैं हात्तीले खल्लो बनाइदिएको छ। हात्ती हाम्रै लागि दशा बनेर आएका रहेछ।’
_x000D_
_x000D_
हात्तीको झुण्डले शुक्लाफाँटा नगरपालिकाको वडा नं १, २, ३, ५, ८ र १२ का दर्जनौँ बासिन्दाको धानबालीमा क्षति गरेको छ।
_x000D_
_x000D_
महिना दिनअघि भारतको दुधुवा नेसनलपार्कबाट यहाँ पुगेका हात्तीको झुण्डले शुक्लाफाँटा नगरपालिकामा मात्रै ४० बिघा बढी क्षेत्रफलमा लगाएको धानबाली नोक्सानी गरेको र एक स्थानीयलाई घाइते बनाएको नगरप्रमुख दिलबहादुर ऐरले बताए।
_x000D_
_x000D_
हात्तीको आतंकबाट पुरै नगरपालिकाका बासिन्दा त्रासमा छन्, उनले भने, ‘धानबाली खाएर सखाप त पार्यो नै स्थानीय बासिन्दाको ज्यान जोगाउन निकै सकस छ।’
_x000D_
_x000D_
स्थानीबासीको जीउधनको सुरक्षा गर्नका लागि नेपाल प्रहरी, सशस्त्र प्रहरी र नेपाली सेनालाई सजग गराइएको उनको भनाइ छ।
_x000D_
_x000D_
सुरक्षा निकायका तीनवटै अंगलाई हात्ती प्रभावित क्षेत्रमा परिचालन गरिएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762771102.png)
