काठमाडौं– वाणिज्य बैंकहरूले भदौको लागि ब्याजदर प्रकाशित गरेका छन्।
२० वाणिज्य बैंकमध्ये आठ वटाले ब्याजदर घटाएका छन्, एउटाको बढेको छ। अन्यको भने ब्याजदर स्थिर छ।
साउनको लागि व्यक्तिगत निक्षेपमा अधिकतम औसत ५.६९ प्रतिशत ब्याजदर दिएका बैंकहरूले भदौको लागि भने औसतमा ५.५८ प्रतिशत ब्याजदर दिने भएका छन्।
आर्थिक वर्षको पहिलो महिना पनि बैंकहरूबाट जाने कर्जामा सुधार देखिएको छैन। बैंकहरू अझै अधिक तरलताको अवस्थामा रहेकोले लागत घटाउन बैंकहरूले निक्षेपको ब्याजदर घटाएका हुन्।
बैंकहरूसँग अहिले पनि करिब १० खर्ब बराबर कर्जा लगानी योग्य पुँजी छ।
बैंकहरूमा करिब ७२ खर्ब २८ अर्ब निक्षेप छ भने ५५ खर्ब ८० अर्ब रूपैयाँ कर्जा लगानी गरेका छन्।
भदौका लागि १ वटा बैंकले ब्याजदर बढाँउदा ८ वटाले ब्याजदर घटाएका छन्। मुद्दति निक्षेपका लागि ब्याजदर बढाउनेमा प्रभु बैंक रहेको छ भने स्ट्याण्डर्ड चार्टर्ड बैंक, लक्ष्मी सनराइज बैंक, एभरेष्ट बैंक, सानिमा बैंक, कुमारी बैंक, सिद्धार्थ बैंक, कृषि विकास बैंक र नेपाल एसबिआई बैंकले ब्याजदर घटाएका छन्।
व्यक्तिगत मुद्दति निक्षेपको ब्याजदर घटाउनेमा स्ट्यान्डर्ड चार्टर्ड बैंक, सिद्धार्थ बैंक, नेपाल एबीआई बैंक, सानिमा बैंक, कुमारी बैंक, एभरेष्ट बैंक, कृषि विकास बैंक र लक्ष्मी सनराइज बैंक छन्। भदौका लागि ब्याजदर घटाएर स्ट्यान्डर्ड चार्टर्ड बैंकले ५.१३ प्रतिशत, सिद्धार्थ, ५.५० प्रतिशत, नेपाल एसबीआई बैंकले ५.२५ प्रतिशत, सानिमा बैंकले ६.७५ प्रतिशत, कुमारी बैंकले ५.२१ प्रतिशत, एभरेष्ट बैंकले ५.७५ प्रतिशत, कृषि विकास बैंकले ५.२० प्रतिशत र लक्ष्मी सनराइज बैंकले ५ प्रतिशत कायम गरेका छन्।
साउनका लागि स्ट्यान्डर्ड चार्टर्ड बैंकले ६.२५ प्रतिशत, सिद्धार्थ बैंकले ५.७५ प्रतिशत, नेपाल एसबीआई बैंकले ५.३५ प्रतिशत, सानिमा बैंकले ७.१८ प्रतिशत, कुमारी बैंकले ५.४१ प्रतिशत, एभरेष्ट बैंकले ६.२५ प्रतिशत, कृषि विकास बैंकले ५.४० प्रतिशत र लक्ष्मी सनराइज बैंकले ५.५० प्रतिशत कायम गरेका थिए।
यसैगरी व्यक्तिगत मुद्दति निक्षेपको अधिकतम ब्याजदर बढाउनेमा हिमालयन बैंक रहेको छ। यो बैंकले साउनमा ५.५० प्रतिशत ब्याज दिएकोमा भदौमा बढाएर ६ प्रतिशत कायम गरेको छ।
ब्याजदर स्थिर राख्नेमा नेपाल बैंक, ग्लोबल आइएमई बैंक, एनआईसी एसिया बैंक, एनएमबी बैंक र प्राइम कमर्सियल बैंक रहेका छन्। साउनमा नेपाल बैंकले ५.४० प्रतिशत, ग्लोबल आइएमई बैंकले ६ प्रतिशत, एनआईसी एसिया बैंकले ६.२५ प्रतिशत, एनएमबी बैंकले ६ प्रतिशत र प्राइम कमर्सियल बैंकले ६ प्रतिशत ब्याजदर कायम गरेका थिए। सोही ब्याजदरलाई यी बैंकले भदौका लागि निरन्तरता दिएका छन्।
उता राष्ट्रियस्तरका अधिकांश विकास बैंकले साउनकै व्यक्तिगत मुद्दति निक्षेपको अधिकतम ब्याजदरलाई भदौमा निरन्तरता दिएका छन्। हालसम्म प्राप्त ४ वटा गरिमा विकास बैंक, मुक्तिनाथ विकास बैंक, कामना सेवा विकास बैंक र महालक्ष्मी विकास बैंकले साउनकै ब्याजदरलाई भदौमा निरन्रता दिएका छन्। साउनमा गरिमाले ६.११ प्रतिशत, मुक्तिनाथले ६.२५ प्रतिशत, कामना सेवाले ६.१५ प्रतिशत र महालक्ष्मीले ६.११ प्रतिशत ब्याजदर कायम गरेका थिए। सोही ब्याजदरलाई यी बैंकहरुले भदौका लागि निरन्तरता दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
