अभिनेता निखिल उप्रेती ‘पिँजडा’ बाट नयाँ शैलीको धुमधड्का गर्दै नेपाली फिल्ममा प्रवेश गरे। स्टन्ट र एक्रोब्याट मिसिएको ‘एक्सन’ ले उनलाई रातारात लोकप्रियताको शिखरमा पुर्यायो। एक्रोब्याटले मानिसको शरीरलाई लचकदार बनाउन सहयोग गर्छ भनिन्छ। यस अर्थमा निखिल राम्रा डान्सर हुनुपर्ने हो। तर फिल्ममा उनको कम्मर मर्किएको देखिनन्।
स्कुले जीवनमा तेक्वान्दो सिकेका निखिल पछि उसु खेलाडी बने। उनी उसुका ‘ए’ लेभलका खेलाडी हुन्। ‘एक्शन’ मिहिनेत गरेर सिकेकाले उनी यो विद्यामा पोख्त भए पनि राम्रोसँग नाच्न नजानेको बताउँछन्।
उनी आफ्नो कमजोर डान्सको विषयमा भन्छन्, ‘हो म नाच्न जान्दिन। एक्रोब्याट आदि गर्ने भएकाले नाच्नलाई मेरो कम्मर त्यहीअनुसार लच्कनु पर्ने हो तर लच्कदैन।’
उनको सुरुमा अभिनेता बन्ने कुनै योजना थिएन। त्यसैले सुरुमा निर्देशन सिकेका थिए। केही समय मुम्बईमा निर्देशनमै सहायकको काम गरे। अभिनय अचानक जुरेको विद्या हो, उनका लागि।
यसैले पनि आफू नृत्यमा निपुर्ण नभएको बताउँछन्। भन्छन्, ‘नेपाल आएपछि यसरी व्यस्त भइयो, समय नै पाइन। जे सिके, सेटमै हो। धेरैले निखिलले एक्शन टिपिहाल्छ, नाचको स्टेप टिप्छ तर नाच्दैन भन्छन्।’
बिहिबार उनी अभिनित ‘पिँजडा ब्याक अगेन’ को गीत सार्वजनिक भयो। लोकगीतमा निखिलको नाचमा रहेको सकस स्पष्ट देखिन्थ्यो। निखिललाई लाग्दैन यो जुनीमा उनको नाच सुध्रिन्छ भनेर। तैपनि उनी भन्छन, ‘समय दिन सके सक्छु भन्ने लागि रहन्छ, मलाई।’
उनीे ‘पिँजडा’ फिल्ममा ‘एक्शन’ भए पनि ‘पिँजडा ब्याक अगेन’ मा अघिल्लो फिल्म जस्तै ‘एक्शन’ को अपेक्षा नगर्न आग्रह गर्छन्।
भन्छन्, ‘एक्शनभन्दा पनि पारिवारीक फिल्म हो।’
‘पिजँडा ब्याक अगेन’ निखिलको यो वर्षको चौथो रिलिज हुनेछ। यस वर्ष रिलिज भएका उनका तीन फिल्म ‘संरक्षण’, ‘राधे’ र ‘रूद्र’ चलेनन्। पछिल्लो रिलिज ‘संरक्षण’ मधेश मुद्धामा केन्द्रित थियो भने ‘राधे’ बेपत्ता नागरिकको कथामा आधारित थियो। यस्तै ‘रूद्र’ मा निखिल पहिलो पटक खलनायक बनेका थिए।
तीन वटै फिल्म कमजोर निर्देशन, पटकथा र प्रस्तुतिले असफल भए। निखिल पनि कमजोर भएकै कारणले आफ्नो अघिल्लो फिल्म नचलेको स्वीकार गर्छन्।
‘हो मेरो ‘भैरव’ पछि कुनै फिल्म चलेको छैन’, उनले भने।
निखिलले आफ्नो फिल्मको लेखनी र साथीभाइको फिल्मलाई ‘नाई’ भन्न नसक्दा आफ्ना फिल्म निरन्तर फ्लप हुनुमा आंशिक सत्यता भएको बताए।
उनले पैसाका लागि फिल्म गरेको स्विकार्दै भने, ‘अब म जथाभावी फिल्म खेल्दिन। फिल्ममा नवीन प्रस्तुति, सिनेम्याटिक स्टाइलले प्रमुखता पाउने छन्। मैले त्यही भएर बाहिरको फिल्म साइन गरेको छैन।’
कलाकारको करिअरमा हिट फिल्मको ठूलो महत्व हुने गर्दछ। त्यसैले अहिले निखिलका लागि एउटा हिट फिल्म अवश्यक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
