संरक्षण नहुँदा करोडौं खर्चिएर बन्दै गरेको नगरपार्क अलपत्र

समाचार

वसन्त भण्डारी बिहीबार, फागुन १५, २०८१ १८:३०

दैलेख– दैलेखको चामुण्डाबिन्द्रासैनी नगरपालिका–६ जम्बुकाँधमा निर्माणधीन नगरपार्क संरक्षण नहुँदा अलपत्र बनेको छ । नगरपालिकाको पर्यटकीय केन्द्रको रुपमा विकास गर्ने लक्ष्यका साथ निर्माण सुरु गरिएको पार्क संरक्षण नहुँदा कराडौंको संरचना अलपत्र छ ।

नगरपालिकाका तत्कालीन नगरप्रमुख सूर्यबहादुर शाहीको कार्यकालमा नगरपार्कको अवधारणासहित निर्माणको काम थालिएको थियो । नगरपार्क निर्माण भए पनि स्थानीय आन्तरिक पर्यटकहरु घुम्न जाने ठाउँको रुपमा विकास हुँदै गइरहेकोमा पछिल्ला वर्षहरुमा संरक्षण र निर्माण कार्यले पूर्णता नपाउँदा अस्तव्यस्त छ ।

नगरपार्क जानको लागि बनाइएका सिँडीहरु भत्किएका छन् भने त्यसमा लगाइएका रेलिङ पूर्ण रुपमा भाँच्चिएका छन् । भवनका सीसाहरु फुटाइएका छन् भने महँगोमा खरिद गरिएको घण्टसमेत जीर्ण बन्दै गएको छ ।

नगरपार्क गुरुयोजना अनुसार चालू आर्थिक वर्ष २०७४/०७५ मा बजेट छुट्याएर निर्माण सुरु गरिएको थियो । गुरुयोजना अनुसार ८ करोड बढी लागत अनुमान गरिएको पार्क निर्माणमा हालसम्म २ करोड बन्दा बढी रकम खर्च भइसकेको छ । संस्कृति, पर्यटन तथा नागरिक उड्ययन मन्त्रालको ७५ प्रतिशत र नगरपालिकाको २५ प्रतिशत लगानी लाग्ने गरी निर्माण सुरु गरिएको थियो ।

गुरुयोजना अनुसार मिनी जु, संग्रहालय, शिव मन्द्रिर, त्यहाँ कार्यरत कर्मचारीको लागि बस्ने घर, फनपार्क, मुख्य गेट, पिक्निक स्पट लगायतका संरचनाहरु निर्माण हुन बाँकी नै छ । वर्तमान नगरपालिकका जनप्रतिनिधिहरुले त्यसको जवाफदेहीता र जिम्मेवारी नलिँदा नगरपार्क अलपत्र अवस्थामा परेको नगरपालिकाका पूर्व मेयर सूर्यबहादुर शाहीले बताए ।

‘क्रमागत योजना अनुसार निर्माण भइरहेको नगरपार्क एउटा नगरकै गौरवको पर्यटकीय क्षेत्र हो,’ उनले भने, ‘वर्तमान जनप्रतिनिधिहरुमा त्यसको जवाफदेहीता र जिम्मेवारी लिने कुरा गरेनन् । जस कारणले निर्माणकै अवस्थामा रहेको नगरपार्क अहिले अलपत्र अवस्थामा छ ।’

वर्तमान जनप्रतिनिधिहरुले नगरकार्यपालिकाको बैठकबाट निर्णय गरेर पर्यटन मन्त्रालयसँग बजेट माग गरेर निर्माण तथा संरक्षणको कामलाई अघि बढाउनुपर्ने उनले बताए ।

यता नगरपालिकाले भने बजेट अभावका कारण संरक्षण तथा निर्माणको कार्य गर्न नसकिएको बताएको छ । नगरपालिकाका प्रमुख (मेयर) गणेश कुमार शाहीले नगरपालिकाले पटक–पटक बजेट माग गर्दा पनि मन्त्रालयबाट बजेट प्राप्त नहुँदा निर्माणको कामलाई निरन्तरता दिन नसकेको बताए ।

‘ठेकेदार कम्पनीको लापरबाहीका कारण अहिले नगरपार्क अलपत्र अवस्थामा छ । संघीय सरकारले बजेट दिएको अवस्थामा निर्माण पुनः हुन्छ,’ उनले भने, ‘नगरपार्क तोडफोड गर्नेलाई पक्राउ गरेर कारबाहीको लागि जिल्लासम्म पुगे पनि कारबाही हुन सकेको छैन । अहिले दिउँसो सुरक्षाकर्मी खटिन्छन् तर राति त्यसको व्यवस्था गर्न सकिएको छैन ।’

स्थानीय स्तरमा पर्यटकीय क्षेत्रको रुपमा विकास भइरहेको नगरपार्क निर्माण र संरक्षणको काम नहुँदा कराडौंको लगानी डुब्ने हो कि भन्दै स्थानीयले चिन्ता व्यक्त गरीरहेका छन् । नगर सदरमुकाम नजिकै रहेको उक्त क्षेत्र अलपत्र अवस्थामा पर्दा घुम्न जाने स्थानीय पर्यटकहरु निराश हुँदै फर्किने गरेका छन् ।