काठमाडौँ – गाजामा युद्धविराम घोषणा भएको एक साता बित्न लाग्दा हमासले ४ जनालाई बन्धकमुक्त गरेको छ । शनिबार हमासले चार इसराइली युवतीलाई बन्धकमुक्त गरेको अन्तर्राष्ट्रिय सञ्चारमाध्यहरूले जनाएका छन् ।
बन्धकमुक्त हुनेमा करिना एरिएभ, ड्यानियला जिल्बोआ, नामा लेभी र लिरी अलबाग छन् । लिरी १९ वर्षकी छन् । बाँकी तीनै जना २० वर्षका छन् ।
उनीहरूलाई हमासले रेडक्रसको जिम्मा लगाएका थिए । रेडक्रसले इसराइली डिफेन्स फोर्स (आइडिएफ)को जिम्मा लगाएको छ । आइडिएफले बन्धकमुक्त हुनेहरूको परिवारलाई खबर गरेका थिए । हमासले बन्धक रिहा गरेपछि इसराइलले पनि बदलामा २०० प्यालेस्टिनीहरूलाई कैदमुक्त गरेको अन्तराष्ट्रिय संचार माध्यामहरुले बताएका छन् ।
इसराइल र हमासबीच गत आइतबार युद्धविराम भएको थियो । त्यसदिन हमासले तीन जनालाई बन्धकमुक्त गरेको थियो भने इसराइलले जेलमा रहेका ९० जनालाई कैदमुक्त गरेको थियो । पहिलो चरणको युद्धविराम ४२ दिनको हुने भनिएको छ । सो अवधिमा हमासले ३३ जना बन्धक छाड्ने सम्झौता भएको छ भने इसराइलले २००० भन्दा बढीलाई कैदमुक्त गर्नेछ ।
हमासले प्रत्येक साता चार जना बन्धक रिहा गर्नेछ । सोही आधारमा इसराइलले प्यालेस्टिनीहरूलाई जेलबाट छाड्नेछ । पहिलो चरणको युद्धविरामकै अवधिमा दोस्रो चरणको युद्धविरामका लागि मध्यस्तकर्ताहरुले छलफल गर्नेछन् । युद्धविराम तीन चरणमा हुने भनिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
