एजेन्सी-अमेरिका र बेलायतले इजरायलविरुद्ध इरानको सैन्य ड्रोनविरुद्ध व्यापक प्रतिबन्धहरूको घोषणा गरेका छन् ।
अमेरिकी अर्थ मन्त्रालयले इरानको मानवरहित हवाई वाहन (युएभी) उत्पादनलाई सक्षम बनाउने १६ व्यक्ति र दुई संस्थालाई लक्षित गर्दै प्रतिबन्ध लगाएको जनाएको छ भने बेलायतले पनि युएभी र ब्यालिस्टिक मिसाइल उद्योगहरूमा सामेल सैन्य सङ्गठन, व्यक्ति र संस्थाहरूलाई लक्षित गरी’ प्रतिबन्ध लगाएको जनाएको छ ।
तेहरानले सिरियास्थित इरानी वाणिज्य दूतावासमा अप्रिल १ मा भएको हवाई आक्रमाणको बदलामा शनिबार राति इजरायलमाथि आफ्नो पहिलो प्रत्यक्ष सैन्य आक्रमण गरेको थियो । आफ्नो दूतावासमा भएको आक्रमणप्रति इरानले इजरायललाई दोष दिएको थियो । आक्रमणमा दुई जनरलसहित इस्लामिक रिभोल्युसनरी गार्डका सात सदस्य मारिएका थिए ।
इरानले गरेको आक्रमणमा तीन सयभन्दा धेरै ड्रोन र मिसाइलहरू समावेश थिए । तीमध्ये अधिकांशलाई इजरायल, अमेरिका र बेलायतसहित उसका सहयोगीले खसाएका थिए । इरानी आक्रमणमा अत्यन्त थोरै क्षति भएको छ । आक्रमणको जवाफमा इजरायलका प्रधानमन्त्री बेन्यामिन नेतान्याहुले इजराइलसँग आफ्नो रक्षा गर्ने अधिकार सुरक्षित रहेको बताएका छन् ।
अमेरिकी अर्थमन्त्री जेनेट येलेनले बेलायतसँगको समन्वय तथा साझेदार तथा सहयोगीहरूको परामर्शमा इजरायलमाथि इरानी आक्रमणको जवाफ दिन निर्णायक कदम चालिरहेको बताइन् ।
इरानको युएभी कार्यक्रमविरुद्ध प्रतिबन्धका साथै अमेरिकाले इरानको स्टिल उद्योगका लागि पार्टपुर्जा उपलब्ध गराउने पाँच कम्पनीमाथि पनि प्रतिबन्ध लगाएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
