बेदकोट (कञ्चनपुर)– कञ्चनपुरको भीमदत्त नगरपालिका–४ महेन्द्रनगरस्थित सिद्धबाबा मन्दिरमा दर्शनार्थीको भीड बढेको छ। मन्दिर बाहिर लहरै ठेला राखेर पसल थापिएको छ।
मन्दिर दर्शनका लागि पुगेका दर्शनार्थी कोही मन्दिरभित्र प्रवेश गरिररहेका छन्। कोही आफूलाई मनपर्ने सामान किन्न व्यापारीसँग मोलमोलाइ गरिरहेका भेटिन्छन्। पछिल्लो केही सातायता महेन्द्रनगरको सिद्धबाबा मन्दिरमा दर्शनार्थीको चहलपहल बढेको हो। हजारौँको सङ्ख्यामा दर्शनार्थी सिद्धबाबाको दर्शनका लागि आउँदा महेन्द्रनगर बजारमा पनि चहलपहल बढेको छ।
पश्चिमी सीमानाका गड्डाचौकी हुँदै भारतीय दर्शनार्थी सिद्धबाबाको दर्शनका लागि आउने श्रद्धालुको भीडभाडले यहाँको व्यापार–व्यवसाय पनि बढेको हो। पछिल्लो समय गड्डाचौकीबाट महेन्द्रनगर बजारसम्मै श्रद्धालुको लस्कर देखिन्छ। नेपाल र भारतमा लाग्ने पूर्णागिरि मेलाले महेन्द्रनगरस्थित सिद्धबाबा मन्दिर दर्शनार्थी गुलजार बनेको छ।
‘अरु बेला दर्शनार्थी कमै हुन्छन्। पूर्णागिरि मेलाले यो समयमा सिद्धबाबा दर्शनका लागि धेरै मानिस पुग्ने गरेका छन्’, सिद्धनाथ मन्दिर व्यवस्थापन समितिका सचिव पुष्कर उप्रेतीले भने, ‘फागु पूर्णिमादेखि वैशाख पूर्णिमासम्म श्रद्धालु बढी आउँछन् । त्यसपछि दर्शनार्थी घट्दै जान्छन्।’
उनका अनुसार हरेक वर्ष फागु पूर्णिमादेखि पूर्णागिरि मेला लाग्ने गरेको छ। यसअवधिमा ठूलो सङ्ख्यामा श्रद्धालु आउने हुनाले भीमदत्त नगरपालिका–९ ब्रह्मदेव र महेन्द्रनगरको सिद्धबाबा मन्दिरमा घुइँचो लागेको हो।
भारतको उत्तराखण्डस्थित पूर्णागिरि मन्दिरमा पुगेपछि सिद्धबाबाको पनि दर्शन गरेमात्रै मनोकामना पूरा हुने मान्यताअनुसार पूर्णागिरिको दर्शन गरेका श्रद्धालु सिद्धबाबाको दर्शन गर्न पुग्ने गरेका छन्। ‘हामी हरेक वर्ष पूर्णागिरि दर्शन गर्छौं। गाडी भाडामा लिएर गाउँभरका मानिस दर्शनका लागि आएका छौं’, सिद्धबाबा मन्दिरमा भेटिएका उत्तरप्रदेश बहराइचका सुकदेवले भने, ‘पूर्णागिरि पुगेपछि सिद्धबाबा पुगेर दर्शन गर्नाले मनोकाङ्क्षा पूरा हुने विश्वास छ।’
पूर्णगिरि मेला भर्न पुगेका नेपालका विभिन्न ठाउँका श्रद्धालुका साथै भारतको उत्तराखण्ड र उत्तरप्रदेशलगायत ठाउँबाट श्रद्धालु सिद्धबाबा दर्शनका लागि पुग्ने गरेका छन्। प्राचीनकालमा सिद्धबाबाले गरेको भक्ति देखेर प्रशन्न भएका पूर्णागिरिले आफ्नो दर्शन गरेपछि सिद्धबाबाको दर्शन गर्नुपर्ने र त्यसपछि मात्रै मनोकाङ्क्षा पूरा हुने बरदान दिएको किंवदन्ती छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
-1789631269.jpg)
