काठमाडौं- हलिउडको सिनेमा च्यानल होम बक्स अफिस (एचबीओ)ले नेपाली सिनेमा ‘रेड सुटकेस’को सेटेलाइट र ओटीटी वितरण किनेको छ। उसले युरोप राइट किनेको हो।
एचबीओले युरोपका १५ देशमा ओटीटीमार्फत सिनेमा प्रदर्शन गर्नेछ। एचबीओले यसरी पहिलो पटक कुनै नेपाली सिनेमा खरिद गरेको हो।
सौगात मल्ल, विपिन कार्की, प्रविण खतिवडा तथा श्रृष्टि श्रेष्ठको प्रमुख अभिनय रहेको सिनेमामा नेपालमा चैत ३० गतेदेखि सार्वजनिक प्रदर्शनमा आउँदैछ।
निर्माण पक्षले एचबीओले १५ वटा युरोपियन देशको लागि ओटीटी अधिकार लिएसँगै आफ्नो लगानी सुरक्षित भएको जानकारी दिए।
फिडेल देवकोटा सिनेमाका निर्देशक हुन्। सिनेमा बेलायतमा आधारित सेल्स एजेन्ट ‘रिजन ८ फिल्मस्’मार्फत बिक्री भएको हो।
यसैगरी यो सिनेमा मलेसिया र ब्रुनाइमा द रेड सुटकेस बिक्री वितरण तथा प्रदर्शनको अधिकार सुराया फिल्मस्ले किनेको छ।
द रेड सुटकेस भेनिस फिल्म फेस्टिभलको होराइजन्स स्ट्र्यान्डमा प्रिमियर भएको थियो। सो फेस्टिभल रनमा जुरिच र मुम्बई समावेश थिए। सिनेमासँग सहकार्य गरेर श्रीलंकामा पोष्ट प्रोडक्सन गरिएको पनि यो नै पहिलो नेपाली सिनेमा हो।
निर्देशक फिडेलले फिल्म निर्माण गर्दा नै आफूहरु परम्परागत बजारको पक्षमा नरहेको र सोही अनुसार नै सिनेमा वितरणको फराकिलो तयारीका साथ अघि बढेको र एचबीओले सिनेमा किनेकोमा खुसी व्यक्त गरे।
‘स्थानीय बजारमा मात्र सिनेमा देखाउँछु भन्नेबारे भर नपरी अन्तर्राष्ट्रिय बजारका लागि पनि चलत्रिच निर्माण गर्नुपर्छ भन्ने मेरो सिद्धान्त हो। यसले हामीलाई नयाँ बजारको खोजीका लागि झक्झक्याउँछ र यसपटक एचबीओमार्फत हामीले नयाँ बजारका रुपमा युरोपका १५ वटा मुलुकलाई पनि पाएका छौं।’
यो सुखद खबर भएको निर्देशक देवकोटाले बताए। उनले भने, ‘आज द रेड सुटकेसले बनाएको यो नयाँ बजार भविष्यमा यसरी बन्ने अन्य नेपाली सिनेमाका लागि पनि त्यत्तिकै फाइदाजनक बन्नेछ।’
भिजुअल एन्थ्रोप्लोजीमा विधावारिधी गरेका फिडेलले यस अघि २०१४ मा सर्ट फिल्म ‘द लास्ट याक हर्डर अफ धे’ र बृत्तचित्र ‘विन्ड अफ चेन्ज इन लो मुस्ताङ’ निर्देशन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
