काठमाडौं- नामका कारण रिलिजको बेलासम्मै विवादित बनेको विपिन कार्की, सुहाना थापा, धीरज मगर अभिनित 'एक भागवत एक गीता' सिनेमालाई यो वर्ष व्यापार गर्ने सिनेमाको सूचीमा राखिएको भए पनि बक्स अफिसमा नराम्ररी पछारियो।
मेकरहरुको सफल ट्र्याक रेकर्ड र बलियो कलाकारको मिश्रण भएकाले सिनेमाले व्यापार गर्ने अनुमान गरिएको थियो। तर रिलिजपछि सिनेमाले नकारात्मक प्रतिक्रिया बटुल्यो। समीक्षकका नजरमा त यो एउटा पट्यारलाग्दो सिनेमा बन्यो नै निर्माताहरुले 'हाम्रा लागि भगवान् भनेका दर्शक हुन्' भन्ने दर्शकबाट पनि यसले आशिर्वाद पाउन सकेन अर्थात् सिनेमा फ्लप भयो।
पहिलो पटक तेस्रोलिङ्गीको भूमिकामा काम गरेका अभिनेता विपिन कार्की यो सिनेमा नचल्नुको मुख्य कारण कमजोर सम्पादनलाई मान्छन्। एक अन्तर्वार्तामा उनले यस्तो बताएका हुन्।
विपिनले सबै कलाकारलाई धेरै स्क्रिन स्पेस दिन खोज्दा सिनेमा असफल भएको बताए। उनले यसलाई आफ्नो व्यक्तिगत धारणा भएको बताएका छन्।
'मैले आफ्ना फिल्म हेर्दा पनि कमीकमजोरीको माध्यमबाट हेर्ने हो। फस्ट एङ्गल नै कहाँ गल्तीहरु भए त भनेर हेर्ने गर्छु', उनले भने, 'मलाई कस्तो लाग्छ भने फिल्म अलिकति सम्पादन र धेरै चाहिँ सबै कलाकारलाई टाइम-स्पेस दिनुपर्ने चक्कर अलिकति बिग्रेको हो।'
उनले कुनै पनि फिल्मको कथा एउटा 'इन्टेन्सिटी'मा हुने र त्यो भंग हुँदा त्यसले फिल्म कमजोर हुने धारणा राखे।
'फिल् चाहिँ एउटा इन्टेन्सिटीमा गइरहेको हुन्छ अनि फेरि अर्कोतिर गएर। सबै कलाकारलाई स्पेस दिने निउँमा, एउटा मात्र कथा भन्दा पनि कथा छुटेर भाग्दो रेछ', उनले भने।
यो सिनेमाको लेखनमा झण्डै ९ जनाको प्रत्यक्ष-अप्रत्यक्ष संलग्नता रहेको थियो। धेरै लेखक हुँदा सिनेमाको लय बिग्रेको बताइन्छ।
सिनेमाले धेरै जना भान्सेले पकाएको खानेकुराको स्वाद खत्तम हुन्छ भन्ने आसयको एक अंग्रेजी भनाइलाई चरितार्थ गरेको चर्चा नेपाली रजतपटमा यो सिनेमाको रिलिजपश्चात चलेको थियो। यो भनाइलाई विपिनको यो भनाइले पनि पुष्टि गर्छ।
सिनेमामा पहिले लेखिएभन्दा रोल काटिएको भन्दै धीरज मगर मेकरसँग असन्तुष्ट थिए र उनी सिनेमाको प्रचारमा पनि खास देखिएनन्।
त्यसैगरी विपिनले 'पशुपति प्रसाद-२ : भष्मे डन'बाट पनि आफू सन्तुष्ट नभएको बताए। 'भष्मे डनमा मैले आशा गरेको भन्दा कम पाइसकेको थिएँ पहिलो शोमा नै', उनले भने।
सिनेमाले व्यापारिक सफलता हासिल गरे पनि पहिलो श्रृंखलाको दाँजोमा सिनेमा कमजोर बन्यो यसको असर वक्सअफिसमा स्पष्ट देखियो।
हाल उनी अभिनित 'महाजात्रा' प्रदर्शनरतः रहेको छ। सिनेमाले राम्रो व्यापार गरिरहेको भए नि समीक्षकका रुपमा सिनेमा कमजोर छ, जसको मुल समस्या दोस्रो हाफको लेखनमा देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
