काठमाडौं– अवकास प्राप्त कर्मचारीले चालू आर्थिक वर्षभरीको निवृत्तभर (पेन्सन) र सामाजिक सुरक्षा भत्ता समयमै पाउने भएका छन्।
अर्थमन्त्री वर्षमान पुनले चालू आर्थिक वर्षको चैत्रदेखि असार मसान्तसम्मको पेन्सन र सामाजिक सुरक्षा भत्ताको लागि ३० अर्ब रकम निकासा गरिदिएको अर्थ मन्त्रालयको एक अधिकारीले बताए।
‘डेढ/दुईसय फाइल पेन्डिङमा छन्। तत्कालका लागि मन्त्रीज्यूले निर्वृत्ति भरण र सामाजिक सुरक्षा भत्तको लागि ३० अर्ब रकमान्तर गरिसक्नुभएको छ,’ ती अधिकारीले भने।
आर्थिक अभाव भएको बेलामा टाइट गरेको नीति ठिक रहेको तर अहिले सहज अवस्थामा भएकाले बजार चलामान बनाउन पेन्सन र सामाजिक सुरक्षा भत्ता वितरण गर्नु पर्ने ती अधिकारीले बताए। ‘पैसा पठायो भने बजारमा रोजगारी बढ्छ अर्थतन्त्र चलायमान हुन्छ। त्यसकारणले बजारमा पैसा पठाउनु भएको हो,’ ती अधिकारीले भने।
तर, चालू आर्थिक वर्षको फागुनसम्मको पेन्सन र सामाजिक सुरक्षा भत्ता वितरण भइसकेको र चैतदेखि असार मसान्तसम्मका लागि २५ अर्ब रकम आवश्यक रहेको निवृत्तभरण व्यवस्थापन कार्यालयका कार्यकारी प्रमुख विष्णुप्रसाद खरेलले बताए।
‘फागुन महिनासम्मको रकम गइसक्यो। चैतदेखि असारसम्मका लागि हामीलाई २५ अर्ब रुपैयाँ आवश्यक हो। त्यो ५ अर्ब रकम अन्य कुनै प्रयोजनका लागि होला,’ खरेलले भने। पेन्सन र सामाजिक सुरक्षा भत्ताको लागि मासिक ६ अर्ब रकम आवश्यक रहेको उनको भनाइ छ।
अर्थमन्त्रीले अर्थतन्त्र सुधार भएको बताउँदै आए पनि अहिले देशको अर्थतन्त्र सुधार भएको छैन। अर्थतन्त्र सुधारमा ल्याउने हो भने विकास खर्च बढाउनुपर्ने अर्थविदहरु बताउँछन्। तर अर्थमन्त्रालयले विकास खर्चलाई प्राथमिकता दिनुपर्नेमा उल्टै चालू खर्चलाई नै बढावा दिन थालेका छ।
चालू वर्षको फागुन मसान्तसम्ममा सरकारको खाता १ खर्ब ३७ अर्ब ७५ करोड बराबर घाटामा रहेको महालेखा नियन्त्रक कार्यालयले जनाएको छ। चालू वर्षको फागुन मसान्तसम्म सरकारले कूल ८ खर्ब १ अर्ब रुपैयाँ खर्च गरेको छ।
जसमध्ये चालूतर्फ ५ खर्ब ८२ अर्ब रुपैयाँ खर्च गरेको छ। पुँजीगततर्फ ८१ अर्ब २१ करोड रुपैयाँ र वित्तीय व्यवस्थापनतर्फ १ अर्ब ३८ अर्ब रुपैयाँ खर्च भएको महालेखा नियन्त्रक कार्यालयले जनाएको छ।
चालू आर्थिक वर्षको साउनदेखि फागुन मसान्तसम्ममा कूल ६ खर्ब ६३ अर्ब ८३ करोडरुपैयाँ राजस्व संकलन भएको छ। जसमध्ये कर राजस्वबाट ५ खर्ब ७८ अर्ब रुपैयाँ र गैर कर राजस्वबाट ६० अर्ब ३७ करोड रुपैयाँ र अन्य प्राप्तिबाट २२ अर्ब २ करोड रुपैयाँ संकलन गरेको छ।
फागुन मसान्तसम्म भएको आम्दानी र खर्च हेर्दा सरकारले संशोधित अनुमान अनुमान अनुसार पनि राजस्व संकलन गर्ने र बजेट खर्च गर्ने सम्भावना देखिँदैन। अर्थ मन्त्रालयले बजेटको अर्धवार्षिक समीक्षामार्फत् चालू आर्थिक वर्षमा १५ खर्ब ३० अर्ब ६२ करोड रुपैयाँ मात्रै खर्च हुने संशोधित अनुमान सार्वजनिक गरेको छ।
जसमध्ये पुँजीगततर्फ ३ खर्ब २ अर्ब ७ करोड विनियोजन गरिएकोमा ८४.१३ प्रतिशत मात्रै खर्च हुने, चालूतर्फ ११ खर्ब ४१ अर्ब ७८ करोड विनियोजन भएकोमा ८८. ८४ प्रतिशत मात्रै खर्च हुने र वित्तीय व्यवस्थापनतर्फ ३ खर्ब ७ अर्ब ४५ करोड विनियोजन गरिएकोमा त्यसको ८७.३९ प्रतिशत मात्र खर्च हुने अर्थ मन्त्रालयको अनुमान छ।
लक्ष्य अनुसार राजस्व संकलन नहुँदा चालू वर्ष १२ खर्ब २ अर्ब रुपैयाँ मात्रै राजस्व संकलन हुने संशोधित लक्ष्य तय गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
