बितेको ६ महिना ३२ नेपाली फिल्म रिलिज भए । तर, सबै फिल्मले राम्रो आम्दानी गर्न सकेनन् । केही फिल्मले वाहवाही भने लुटे । औसत प्रतिमहिना एउटा फिल्मले राम्रो आम्दानी गर्न सफल भयो । यिनै फिल्मको कमाइका कारण नेपाली फिल्मले इज्जत धान्यो।
नयाँ वर्षमा समीक्षक दीपेन्द्र लामाको 'घामपानी' र ‘पशुपति प्रसाद’ बाट सर्वाधिक चर्चा बटुलेका दीपेन्द्र के खनाल निर्देशित ‘लभ लभ लभ’ बाट सुरु भयो । तर, दुवै निर्देशकको काम औसतबाट माथि उठ्न सकेन । दुवै फिल्मले औसत समीक्षा पाए पनि व्यापार मध्यम रह्यो।
लामो समय फिल्म समीक्षाका कारण चर्चा र आलोचना खेप्ने गरेका लामाको प्रेमकथामा आधारित फिल्मले 'आइडिया’ का लागि प्रशंसा बटुले पनि गतिलो प्रतिक्रिया आएन । ‘पशुपति प्रसाद’ का कारण ‘लभ लभ लभ’ बाट बढी आशा गरिएका खनालले दर्शक र समीक्षक दुबैलाई निराश पारे।
ततपश्चात् नेपाली बक्स अफिस भारतीय फिल्म ‘बाहुबली’ को प्रभावमा रह्यो । जेठ महिना नेपाली फिल्म उद्योगका लागि सबैभन्दा बिर्सन लायक बन्यो । लगातार ७ फिल्म बक्स अफिसमा नराम्ररी पछारिए।
कमजोर कथा, पटकथा र निर्देशनले फिल्महरु थला परे । असारमा पनि ६ फिल्म रिलिज भए, जसमा सुदर्शन थापा निर्देशित ‘म यस्तो गीत गाउँछु’ र दीपेन्द्र के खनालको ‘धनपति’ बाट ठूलो आशा गरिएको थियो। थापाको फिल्म व्यावसायिक रूपमा सफल भए पनि समीक्षकलाई रिझाउन असफल रह्यो । समीक्षकले ९० को दशकमा बलिउड फिल्मको बासी कथा पस्किएको भन्दै निकै आलोचना गरे।
‘पशुपति प्रसाद’ कै टिमको प्रस्तुतिका कारण दर्शक र समीक्षकको पर्खाइ बनेको ‘धनपति’ पनि आलोचित बन्न पुग्यो । फिल्मको कथ्य शैलीमाथि समीक्षकले औंला उठाए । अघिल्लो फिल्मको प्रशंसाले पुलपुलिएका अभिनेता खगेन्द्र लामिछानेले यसपटक आलोचना खेप्नुपर्यो । यस बाहेक सिक्वलका कारण चर्चामा रहेको सुनिल रावलको ‘सायद २’ बिर्सनलायक बन्यो।
साउनमा मधेस केन्द्रित राजनीति र त्यसको केन्द्रीय राजनीतिको शल्यक्रिया भनेर एउटा वृत्तलाई आकर्षित गरेको पुणेन्द्रु झाको निर्देशकीय डेव्यू फिल्म ‘संरक्षण’ ले राजनीतिक भाषणभन्दा केही पस्कन सकेन । बक्स अफिसमा पनि फिल्मले पानी खायो।
सिक्वलका कारण चर्चामा रहेको ‘प्रेम गीत २’ ले व्यापारिक सफलता हात पारे पनि गतिलो नबनेको प्रतिक्रिया आयो । साउनमा रिलिज भएका निखिल उप्रेती स्टारर ’रूद्र’ पर्दामा कमजोर देखियो । ‘मेरी कुसुम’ नामक फिल्म रिलिज भए-नभएको कसैलाई पत्तो भएन।
भावी सुपरस्टार भन्दै प्रचारित आशिरमान देशराज श्रेष्ठलाई भदौमा डेव्यू गराइएको फिल्म ‘ग्याङस्टर ब्लुज’ बाट निर्देशक हेमराज बिसीले स्याबासी पाउन सकेनन् । फिल्म निकै कमजोर भएको टिप्पणी आयो । यद्यपि आशिरमान यस फिल्मबाट सम्भावना बोकेको अभिनेताका रूपमा देखा परे।
भलिबल सुन्दरी सिपोरा गुरूङले नेपाली हिरोइनमा सर्वाधिक पारिश्रमिक बुझ्दै अनुबन्धित भएको भनिएको ‘भुइँमान्छे’ ले गतिलो फिल्म नभएको समीक्षा पायो । यस्तै, 'जेन्टलम्यान', 'लीला', 'ए मेरो हजुर २', 'शरणार्थी' तथा 'देश खोज्दै जाँदा' फिल्मको हालत ‘आया राम गया राम’ साबित भयो । यी फिल्मले निराश बनाए पनि निश्चल बस्नेत अभिनेता एवं निर्माता रहेको ‘दुई रूपैयाँ’ ले कमाइको दृष्टि राम्रो गर्यो । तर, उनी पनि समीक्षकको अलोचनाबाट बच्न सकेनन् ।
‘लुट’ फिल्मबाट आफ्नो अलग्गै पहिचान बनाएका निश्चलको फिल्म छनोटलाई समीक्षकले मन पराएनन् । उनले कमजोर अभिनयका लागि नकारात्मक प्रतिक्रिया पाए।
‘ड्रिम्स’ बाट स्टारडमको छनक दिएकी साम्राज्ञी राज्यलक्ष्मी शाह अभिनीत 'ए मेरो हजुर २' फिल्मले आफ्नो लोकप्रिय गीत-संगीतका कारण गतिलो ओपनिङ पायो । फिल्मको ओपनिङका लागि साम्राज्ञीको स्टार पावरलाई कारक मानियो । तर, अभिनेत्री झरना थापाको निर्देशकीय डेव्यू फिल्म अन्य फिल्म झैं कमजोर निर्देशन र खुकुलो सम्पादनका कारण चिप्लिन पुग्यो।
त्यस्तै, असोज महिनामा ३ फिल्म रिलिज भए । जसमध्ये दीपाश्री निर्देशित ‘छक्का पञ्जा २’ सर्वाधिक हाइपको फिल्म थियो । पहिलो सिक्वलको कीर्तिमानी कमाइले फिल्म दर्शकका लागि प्रतीक्षित बनेको भए पनि पर्दामा फिल्मले अघिल्लो सिक्वल जस्तो खासै प्रशंसा बटुल्न सकेन । गहन विषयमा हलुका मन्थन गरिएको भनेर फिल्मले चौतर्फी आलोचना खेप्यो।
एक साता अगाडि रिलिज घोषणा गरेर प्रदर्शनमा आएको रोज राणा निर्देशित फिल्म ‘मेरो पैसा खोई’ ले फरक शैलीका लागि जस पाए पनि असफल बन्न पुग्यो । बलिउड निर्देशक विवेक शर्माले बीचैमा छाडेको फिल्म हतारिएर रिलिज गरिँदा अलपत्र पर्यो।
गत वर्ष ‘सेतो सूर्य’ तथा ‘कालो पोथी’ का कारण अन्तर्राष्ट्रिय स्तरमा चर्चा बटुलेको नेपाली फिल्म यस वर्ष गुणस्तर र नवीनताका हिसाबले खासै उपलब्धिमूलक देखिएको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
