उदयपुर- बिहीबारदेखि कटारीको त्रिवेणी माविमा सञ्चालन भएको १३ औं राष्ट्रपति रनिङ शिल्ड प्रतियोगिता सम्पन्न भएको छ। तीन दिनसम्म चलेको प्रतियोगितामा ३१ स्वर्ण २० रजत र २० काँस्य गरि कुल ७१ पदक जित्दै कटारी नगरपालिकाले यस वर्षको रनिङ शिल्डको उपाधि हात पारेको छ।
त्यस्तै, प्रतियोगितामा २५ स्वर्ण १७ रजत र ३५ काँस्य गरी कुल ७७ पदक जित्दै त्रियुगा नगरपालिका दोस्रो भएको छ। उदयपुरगढी गाउँपालिका ४ स्वर्ण १ रजत र २ कास्य गरि कुल ७ पदक जित्दै तेस्रो स्थान हासिल गरेकोछ।
जिल्लाका ८ पालिकामध्ये प्रतियोगितामा ६ वटा पालिकाले स्वर्ण पदकसहित अन्य पदक हात पारेका छन्। एउटा पालिकाले स्वर्ण पदक प्राप्त गर्न सकेन। लिंचुङबुङ गाउँपालिका भने प्रतियोगीतामा सहभागी भएको थिएन।
'स्वास्थ्यका लागि खेलकुद राष्ट्रका लागि खेलकुद' भन्ने नाराका साथ तीन दिनसम्म चलेको प्रतियोगितामा कबड्डी कराँते ,तेक्वान्दो, उसु, एथलेटिक्स (महिला/पुरुष ) दौड प्रतियोगिता अन्तर्गत १०० मि, २०० मि, ४०० मि, ८०० मि, १५०० मि, ३००० मिटर, हाइजम्प, लङ्गजम्प, त्रिपल जम्प, ज्याभलिङ्ग थ्रो, सटपुट, १०० ह ४ रिले र ४०० ह ४ रिले लगायतका खेलमा ७ पालिकाका ६ सय ४ खेलाडीहरुले विभिन्न ६ खेल विधामा प्रतिस्पर्धा गरेका थिए।
भलिबल पुरुषतर्फ त्रियुगा नगरपालिका प्रथम र चौदण्डी नगरपालिका दोस्रो भयो। महिलातर्फको भलिबलमा त्रियुगा नगरपालिका प्रथम, कटारी नगरपालिका दोस्रो भयो।
कपर्दी पुरुषतर्फ त्रियुगा नगरपालिका प्रथम, कटारी नगरपालिका दोस्रो भयो भने महिलातर्फ कटारी नगरपालिका प्रथम, त्रियुगा नगरपालिका दोस्रो भयो।
एथ्लेटिक्समा कटारी नगरपालिका प्रथम, त्रियुगा नगरपालिका दोस्रो भए।
जिल्ला खेलकुद विकास समिति, उदयपुरको आयोजनामा प्रतियोगिता सञ्चालन गरिएको हो।
जिल्ला प्रतियोगिताबाट छनौट भएका ९८ जना खेलाडी यही फागुन २४ गतेदेखि सुनसरी इटहरीमा आयोजना हुने प्रदेश स्तरीय राष्ट्रपति रनिङ शिल्ड प्रतियोगितामा सहभागिता जनाउन जाने खेलकुद विकास समिति कार्यालय प्रमुख रामबाबु यादवले बताए।
विजयी खेलाडीहरुलाई कटारी नगरपालिकाका प्रमुख राजेश्चन्द्र श्रेष्ठले पुरस्कार वितरण गदै खेलकुदले अनुशासित बनाइ जीवनका हरेक गतिविधिलाई सबल र सशक्त बनाउदै लैजाने बताए। श्रेष्ठले खेलकुद क्षेत्रमा राज्यको प्रत्यक्ष भूमिका रहेको कुरामा जोड दिँदै प्रत्येक खेल विधाले राष्ट्रिय रुपमा पहिचान निमार्णमा सहयोग गर्ने विश्वास व्यक्त गदै खेलकुदको विकासमा सबै क्षेत्रको भुमिका अहम् रहनुपर्ने बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।