नयाँ दिल्ली (एजेन्सी) – बलिउडका महानायक तथा बिग बी उपनामले ख्याति कमाएका अमिताभ बच्चन आजबाट ७५ वर्ष पुगेका छन् । 'उमेर भनेको केवल एक संख्या हो' भन्ने उखान उनका लागि निकै सान्दर्भिक हुन्छ । किनकि साढे सात दशकको उमेर खियाइसक्दा पनि उनको जोश र सक्रियतामा कुनै कमी देखिँदैन।
पछिल्लो चार दशकमा कहिले 'विजय' बनेर त कहिले 'पा' को भूमिकामा अमिताभ छाउँदै आएका छन् । ७५ वर्षको उमेर सामान्यतया रिटायर्ड भएर आराम गर्ने समय हो । तर, उनका आउँदै गरेका फिल्महरुको सूची हेर्दा र १७ वर्षदेखि 'कौन बनेगा करोडपति' का होस्टको रुपमा देख्दा अमिताभको अभिनयको सफर अहिले पनि जारी छ । यस वर्ष मात्र होइन, आगामी केही वर्षसम्म अमिताभको डायरीमा खाली समय छैन।
अमिताभ आगामी केही वर्ष एक-दुई मात्र होइन, पाँच अलग-अलग फिल्ममा देखिनेछन् । यसमा सबैभन्दा अगाडि छ, २०१८ को दीवालीको कोसेली 'ठग्स अफ हिन्दुस्तान' । यस फिल्ममा पहिलो पटक अमिताभ र आमिर खान एकसाथ देखा पर्नेछन् । सो फिल्मको निर्देशन विजय कृष्णा आचार्यले गरेका छन् । 'ठग्स अफ हिन्दुस्तान' मा अमिताभ र आमिरका साथै कैटरिना कैफ र फातिमा सना शेख पनि देखा पर्नेछन्।
यसपछि आउने अर्को फिल्म हो '१०२ नटआउट' । पछिल्लो फिल्म 'अमर अकबर एन्थनी' मा एकसाथ काम गरेका अमिताभ र ऋषि कपुर करिब २६ वर्षपछि यो फिल्ममा फेरि सँगै देखिनेछन् । यस फिल्मको निर्देशन 'ओएमजी- ओह माई गड' र 'अल इज वेल' जस्ता फिल्म बनाइसकेका उमेश शुक्लाले गर्नेछन्।
यो फिल्म १०२ वर्षीय एक पिता दत्तात्रेय बखारिया र उनका ७५ वर्षका छोरा बाबुको कथा हो।
अमिताभले काम गर्ने अर्को फिल्म हो, प्याडम्यान । ट्विंकल खन्नाको प्रोडक्सन हाउसमा बन्ने फिल्ममा अक्षय कुमार महत्त्वपूर्ण भूमिकामा भए पनि अमिताभलाई पनि देख्न पाइनेछ । निर्देशक आर बाल्कीको यो फिल्ममा महिलाको मासिक धर्मलाई हेरेर एक व्यक्तिले सस्तो सेनेट्री प्याड बनाउने कहानी प्रस्तुत गरिनेछ।
२००२ मा आएको फिल्म 'आंखे' फिल्म धेरै दर्शकको मनमा बसेको थियो । तीन जना दृष्टिविहीन व्यक्तिले बैंक लुटेको कथा रहेको सो फिल्मको सिक्वल चाँडै बन्ने भएको छ । रिपोर्ट अनुसार 'आंखे २' में अमिताभका साथै इलियाना डिक्रुज र अनिल कपुर पनि देखिन सम्भावना छ।
यी फिल्म बाहेक रणवीर कपुर र आलिया भट्टको नयाँ फिल्ममा पनि अमिताभको अभिनय देख्न पाइनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771329290.png)
-1764146706.png)
