चितवन– मुग्लिन–नारायणगढ सडक खण्डबाट मंगलबार बिहान त्रिशुली नदीमा खसेको गाडी नदीबाट बाहिर निकालिएको छ। मंगलबार बिहान ४:५० बजेको समयमा भारतीय नम्बर प्लेट बी आर ०९ जी सी १४३९ भएको गाडी त्रिशुलीमा खसेको थियो।
इच्छाकामना गाउँपालिका–५ स्थित ३ नम्बर पुल नजिकबाट मंगलबार बिहान त्रिशुली नदीमा गाडी खसेको भन्दै स्थानीयले प्रहरीलाई खबर गरेका थिए। ३ नम्बर पुलमा पुगेर हेर्दा नदी भित्र गाडीको बत्ती बलेको देखेपछि प्रहरीले खोजी गरेको थियो।
तस्बिर सौजन्य: मुग्लिन बजार फेसबूक पेज
सशस्त्र प्रहरी बलका गोताखोरको टोलीले नदीभित्र पसेर खोजी गर्दा गाडी मात्रै भेटिएको थियो। गाडीका चालकसहित सवार व्यक्ति पनि नदीमा खसेको हुनसक्ने आशंकासहित खोजी गरिए पनि फेला परेका थिएनन्।
उक्त गाडीका चालक दुर्घटनास्थलबाट अर्कै गाडीमा लिफ्ट मागेर त्यहाँबाट अन्तै (नारायणगढतर्फ) गएको सूचना प्रहरीले पाएको थियो। दुर्घटना भएको समयमा ३ नम्बर पुल क्षेत्र भएर हिँडेका सवारी साधनका चालकहरुलाई सोध्ने क्रममा उक्त गाडीका चालक भिजेको अवस्थामा एउटा गाडीमा लिफ्ट मागेर नारायणगढतर्फ गएको भन्ने जानकारी प्रहरीले प्राप्त गरेको थियो।
तर खोजीका क्रममा उक्त गाडीका चालक फेला भने परेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768438874.png)
-1764146706.png)
-1768395492.png)
