काठमाडौं– मंगलबार साँझ काठमाडौंको बुढानिलकण्ठ नगरपालिका–७ हात्तीगौंडास्थित ‘तपस्वी’रामबहादुर बम्जनको घरमा प्रहरीको केन्द्रीय अनुसन्धान ब्यूरो सीआईबीको टोली तैनाथ थियो।
हत्या र बलात्कार बालयौन दुराचार मुद्दामा फरार रहेका बम्जन श्रीमती र छोराछोरीसहित बस्दै आएको सीआईबीले पक्का गरेको थियो। उनी त्यहिँ छन् भन्ने पक्का भएपछि ब्यूरोले नियन्त्रणमा लिने प्रक्रिया सुरु गर्यो।
तर सीआईबीको टोलीले घेरा हालेको सुइको पाएका बम्जन भाग्न थाले। भाग्ने क्रममा उनले घरको दोस्रो तलाबाट हाम पनि फाले। तर तैनाथ ब्यूरोको टोलीले नियन्त्रणमा लियो।
२०७७ असारमै फरार प्रतिवादी बनाइएर मुद्दा दायर गरिएका उनलाई प्रहरीले खोजी गरिरहेको थियो। तर मंगलबार साँझ भने सीआईबीले हात्तिगौंडास्थित उनको घरबाट छापा मारेर पक्राउ गरेको हो।
ब्यूरोका डीएसपी धर्मराज भण्डारी नेतृत्वको टिम उनी बस्ने घरमा पुगेको थियो। त्यहाँ उनी परिवारसँग बस्दै आएको पाइएको छ। उनको निगरानीका लागि २५ जना प्रहरी परिचालन गरिएको सीआईबीले जनाएको छ।
उनको घर खानतलासी गरिएको छ। पक्राउ परेका बम्जनलाई भने महाराजगञ्जस्थित ब्यूरोको कार्यालयमा ल्याइएको छ। उनीविरुद्ध सिन्धुपाल्चोक र मकवानपुरमा मान्छे बेपत्ता बनाएको मुद्दा छ भने सर्लाहीमा बाल यौन दुराचारको मुद्दा छ।
आनीसहित ४ जनालाई बेपत्ता बनाएको, बलात्कार गरेको र हत्या गरेको आरोपमा प्रहरीले उनलाई खोजिरहेको थियो। यसअघि पनि प्रहरीले उनको खोजीका लागि सिन्धुलीमा सर्च अप्रेशन नै चलाएको थियो। तर पटक–पटक प्रयास गर्दा पनि उनी पक्राउ परेका थिएनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
