काठमाडौं– देशका विभिन्न भागमा आयोजना हुने विभिन्न मेला र महोत्सवमा कलाकारका नाममा हुने छाडा प्रस्तुति रोकिदिन कलाकारहरुले गृहमन्त्रीलाई आग्रह गरेका छन्।
लोक कलाकारहरुको छाता संगठन नेपाल लोक तथा दोहोरी गीत प्रतिष्ठानका अध्यक्ष गायक बद्री पंगेनीको नेतृत्वमा गएको कलाकारको टोलीले गृहमन्त्री जनार्दन शर्मालाई भेटेर यस्तो आग्रह गरेको हो।
पछिल्लो समय केही कलाकारले द्विअर्थी गीत गाउने, भद्दा पहिरनमा नृत्य गर्ने र प्रहसनमा अश्लील शब्द प्रयोग गर्ने गरिरहेका छन् । उनीहरुको छाडापनका कारण दर्शकलाई असहज हुनुका साथै सबै कलाकार बदनाम हुन थालेको भन्दै यस्तो कदम चालिएको प्रतिष्ठानका केन्द्रीय सदस्य तथा गीतकार शिव हमालले बताए।
उनले भने, ‘कलाकारिता क्षेत्रमा रहेको विकृति हटाउन हामीले संस्थागत पहल गरिरहेका छौं । समाजलाई नपच्ने खालका प्रस्तुति रोक्ने राज्यको पनि दायित्व रहेको स्मरण गराएका हौं।’
गृहमन्त्री शर्माले सो विषयमा आफू गम्भीर रहेको बताउँदै तत्काल सम्बन्धित अधिकारीलाई काम अघि बढाउन निर्देशन दिएका छन्।
जिल्लाका विभिन्न ठाउँमा महोत्सव आयोजना गर्ने आयोजकले सम्बन्धित प्रशासन कार्यालयमा अनुमति लिँदा त्यस्ता क्रियाकलाप नगर्ने सहमति गर्नेछन् । प्रशासनले शान्ति-सुरक्षाका लागि खटाइएका प्रहरीलाई समाजमा अपाच्य हुने खालका प्रस्तुति रोक्न निर्देशन दिने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771329290.png)
-1764146706.png)
