काठमाडौं- एक सयदेखि ३ सय बेड सम्मका सरकारी अस्पतालमा नर्सिङ र पारामेडिक्स पढाउने प्रस्ताव स्वास्थ्य मन्त्रालयले गरेको छ। मंगलबार मन्त्रालयस्तरबाट उक्त प्रस्ताव अघि सार्दै पढाउन सक्ने अस्पतालहरूको राय मागिएको स्वास्थ्य तथा जनसंख्यामन्त्री मोहन बस्नेतले जानकारी दिए।
उनले भने, `पारामेडिक्स र नर्स पढाउन ती अस्पतालमा जनशक्ति पुग्छ भन्ने हामीलाई लागेको छ। संरचनामा अलिकति थपघट गर्नुपर्ने होला। पढाउनका लागि आवश्यक जनशक्ति र संरचनाको विषयमा अस्पतालसँग राय मागेका छौं।’
प्रधानमन्त्री पुष्पकमल दाहाल र आफ्नो पार्टी सभापति शेरबहादुर देउवासँग यसबारे छलफल गरेको उनले बताएका छन्।
आफ्नो यो कामले नेपालको मेडिकल शिक्षामा क्रान्तिकारी परिवर्तन ल्याउने उनको दाबी छ।
चिकित्सा शिक्षा ऐनले यसमा बाधा पार्ने अवस्थामा ऐन संशोधनको तयारीसमेत भइरहेको उनले संकेत गरेका छन्। उनले भने, `प्रधानमन्त्री, शिक्षामन्त्री र चिकित्सा शिक्षा आयोगका उपाध्यक्ष राखेर छलफल भइसकेको छ।’
यसैगरी स्वास्थ्य सचिव डा रोशन पोखरेलले सरकारसँग भएको संरचना र जनशक्तिको उपयोग गर्न छलफल थालेको बताए। स्वास्थ्य मन्त्रालयले स्वास्थ्य शिक्षामा पहल थालेको रूपमा बुझ्नुपर्ने उनको भनाइ छ।
`भौतिक संरचना, गुणस्तर र जनशक्तिका विषयमा पनि छलफल गर्दै जानेछौं’, उनले भने।
सहमतिका लागि चिकित्सा शिक्षा आयोगलाई पत्र लेखिसकेको मन्त्री बस्नेतले उल्लेख गरेका छन्। यसैगरी ३ सय भन्दामाथि बेडका अस्पतालमा एमबीबीएस पढाउनका लागि पनि अनुमति दिने विषयमा छलफल भइरहेको उनले बताए।
नेपालमा स्वास्थ्य जनशक्ति अभाव देखिन थालेकाले उक्त प्रस्ताव अघि सारिएको बताइएको छ। तर, यो प्रस्ताव कार्यान्वयनको चरणमा जान भने समय लाग्ने बताइएको छ। जनशक्ति, भौतिक संरचना र कानुनी आधारका विषयमा मन्त्रालयले छलफल सुरू गरेको हो। यसको यथाशीघ्र कार्यान्वयनका लागि सबैतिरबाट पहल र दबाब जरुरी हुने मन्त्री बस्नेतले बताए।
यसैगरी स्वास्थ्यमा जनशक्ति बढाउनसमेत पहल थालेको उनको भनाइ छ। विंस २०५२ पछि स्वास्थ्यमा जनशक्ति नबढेको उल्लेख गर्दै आफूले त्यसमासमेत पहल गरिरहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778724016.jpg)
-1764146706.png)
