काठमाडौं– मंगलबारदेखि ललितपुरको जावलाखेलस्थित खेल मैदानमा १६औं गोदावरी फूलको प्रतियोगितात्मक प्रदर्शनी सुरु भएको छ। फ्लोरिकल्चर एसोसिएसन नेपाल (फ्यान)ले नजिकिँदै गरेको तिहार तथा छठ पर्वलाई लक्षित गर्दै प्रदर्शनी आयोजना गरेको हो।
‘रोपेर फूल गोदावरी, सजाऔं घर आँगन वरिपरि’ भन्ने नाराका साथ सुरु भएको उक्त प्रतियोगितात्मक प्रदर्शनी कात्तिक १८ गतेसम्म रहने फ्लोरिकल्चर एशोसिएसन नेपालले जनाएको छ।
गोदावरी फूलको व्यावसायिक प्रवर्द्धन गर्न, समय अनुकूल पुष्पको जातीय विकास एवं गुणस्तरीय उत्पादनमा सहयोग पुर्याउने उद्देश्यले आयोजना गरिएको फ्यानका अध्यक्ष मिनबहादुर तामाङले बताए।
प्रदर्शनी गोदावरी फूलको प्रतिस्पर्धात्मक प्रदर्शनीसमेत रहेकोले गोदावरी फूलको ५ वटा प्रजातिमा प्रतिस्पर्धा गराई पुरस्कृत गर्ने उनले बताए।
प्रतिस्पर्धा हुने गोदावरीको प्रजातिहरूमा १० मिनियचर, २० स्पाईडर, ३० रिफ्लेक्स, ४० ईन्कर्म र ५० गोदावरीको कट फ्लावर रहेका छन्।
‘मेलामा सहभागी भएको नर्सरी व्यवसायीहरुलाई उत्साह थप्नका लागि उत्कृष्ठ स्टललाई पनि पुरस्कृत गरिने छ। प्रतिस्पर्धामा प्रथम, दोस्रो, तेस्रो तथा उत्कृष्ठ हुने नर्सरी र फर्मलाई सिल्ड, नगद तथा प्रमाण पत्रद्वारा पुरस्कृत गरिने छ,’ उनले भने।
प्रदर्शनीमा व्यवसायिक स्टल ५५, प्रतियोगितात्मक स्टल र सूचनामूलक ५ गरि जम्मा ६२ वटा प्रदर्शनी स्टल रहेका छन्। विगतमा ४ दिने मेला हुने गरेकोमा यस वर्ष १ दिन थप गरी ५ दिने मेला लाग्ने भएको छ।
गोदावरी फूलको प्रदर्शनीमा ४० हजार बढीले प्रत्यक्ष अवलोकन गर्नुका साथै एक करोडभन्दा बढीको व्यवसायिक कारोबार हुने अपेक्षा गरिएको अध्यक्ष तामाङले बताए।
हाल नेपालमा ४८ जिल्लाको करिब २२१ हेक्टर क्षेत्रफलमा पुष्प व्यवसाय भइरहेको फ्यानको तथ्याकं छ। पुष्प व्यवसायमा प्रत्यक्ष तथा अप्रत्यक्ष गरी ४४ हजारभन्दा बढी जनशक्ति संलग्न रहेको उनको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।