कांग्रेस केन्द्रीय समिति बैठक (फाइल तस्बिर)
काठमाडौं– सत्तारुढ दल नेपाली कांग्रेसको जारी केन्द्रीय कार्यसमितिको बैठकमा शिक्षकहरुको आन्दोलनको विषयले प्रवेश पाएको छ।
शिक्षकहरुले उठाएका जायज मागहरु सम्बोधन गर्न कांग्रेस केन्द्रीय सदस्यहरुले आग्रह गरेका छन्। कांग्रेस संसदीय दलका प्रमुख सचेतक रमेश लेखकले शिक्षकहरुको जायज मागहरु सम्बोधन गर्नुपर्ने बताए। उनले भने,‘ शिक्षा विधेकयबारे पार्टीले नेतृत्वको तर्फबाट एउटा निर्णय गर्नुपर्छ। शिक्षा विधेयकको बिषयलाई लिएर शिक्षकहरु आन्दोलनरत हुनुहुन्छ। उहाँहरुको जायज माग पुरा गर्न हामीले हाम्रो तर्फबाट पहल गरिरहेका छौँ।’
अर्का केन्द्रीय सदस्य गुरु बरालले शिक्षकहरुले आन्दोलनमा रहेको र उनीहरुका पनि पीडा रहेको बताए। कतिपय मागहरु संविधान जारी गर्दाको मूल मर्मलाई नबुझिने गरी आएकाले त्यसको सम्बोधन गरिनु जरुरी रहेको बरालको भनाइ छ। ‘शिक्षकहरु आन्दोलनमा हुनुहुन्छ। उहाँहरुका पनि पीडा होलान्। तर संविधान जारी गर्दाको मूल मर्मलाई नबुझिने गरी आएका ती कुरालाई सम्बोधन गर्न जरुरी छ। यो देशमा पार्टीका नेता कार्यकर्तालाई न्यायाधीश बनाउने गरेका छौं,’ उनले भने, ‘विश्वविद्यालयका भीसीलाई झोले र कार्यकर्ता बनाएका छौं। विद्यालयका प्रध्यापकहरु त्यस्तै बनाउने गरेका छौं। अनि हामीले सुशासनको परिकल्पना पनि गरेका छौं। असल शिक्षाको असल न्यायको परिकल्पना गरेका छौं।’
कांग्रेस केन्द्रीय सदस्य इश्वरी न्यौपानेले शिक्षकका जायज मागहरु सम्बोधन गर्नका लागि कांग्रेसले नेतृत्व गर्नुपर्नेमा जोड दिइन। न्यौपानेले भनिन्, ‘हाम्रो प्रजातान्त्रिक आन्दोलनमा दियो बाल्ने शिक्षकहरु हुनुहुन्छ। उहाँहरुका जायज मागहरुका सन्दर्भमा कांग्रेसको यही बैठक संवेदनशील हुनुपर्छ। हामी बैठक सकिएर जाने बेलासम्म उहाँहरुको मागहरु पूरा होस्।’
अर्का केन्द्रीय सदस्य तारामान गुरुङले शिक्षकलाई मन पराउने किसिमको शिक्षा विधेयक किन ल्याउन सकिएन भन्दै प्रश्न गरे। बैठकको सुरुवातमै उनले भने, ‘हामीले संविधान जारी गर्यौँ। तर शिक्षकलाई मन पराउने किसिमको शिक्षा विधेयक किन ल्याउन सकेनौं? आज किन आन्दोलन गर्नुपर्यो? यो विषयमा कांग्रेस बैठकले गम्भीरताका साथ निर्णय गरेर अघि बढ्नुपर्छ। र शिक्षकहरुको मागलाई पूरा गर्नुपर्छ।’ उनले शिक्षकका मागहरु पूरा गर्दैगर्दा स्थानीय तहका जनप्रतिनिधि र शिक्षकहरुबीच बैमनश्यताको अन्त्य हुने खालको विधेयक बनाउनुपर्ने बताए। शिक्षकहरुलाई खुसी पार्ने नाममा स्थानीय तहका जनप्रतिनिधिहरुका अधिकार कटौती गर्न नहुने गुरुङको भनाइ छ।
केन्द्रीय सदस्य अजय कुमार सिवाकोटीले विद्यार्थी विदेशमा, शिक्षकहरु सडकमा र मजदुर गर्ने मजदुरहरु मलेसिया र कतार लगायतका खाडीमा गइरहेको बताए।
कांग्रेस केन्द्रीय सदस्य मीन विश्वकर्माले लाखौं शिक्षकहरु सडकमा आइरहेकोले उनीहरुको माग पूरा गर्नुपर्नेमा जोड दिए। उनले भने, ‘ठूल्ठूला दलहरुले खुला मञ्चमा आन्दोलन गर्दा १० हजार मास पुर्याउन गाह्रो हुन्थ्यो। तर स्कुलमा चक डस्टर बोकर आएका शिक्षकहरु सडकमा आउँदा लाखभन्दा बढीको संख्यामा उपस्थित छन्। यसलाई सामान्य रुपमा लिनु हुँदैन र यो बैठकले गम्भीर रुपमा लिनुपर्छ।’ उनले कांग्रेस सरकारमा रहेको बेलामै शिक्षकका मागहरु छिटोभन्दा छिटो समाधान गर्नुपर्नेमा जोड दिए।
स्थानीय तह एउटा सरकारको रुपमा रहेको र शिक्षकहरु वर्ग भएकाले वर्गहरुको माग सम्बोधन गर्नका लागि एउटा देखाएर अर्कोलाई तर्साउने कामको अन्त्य हुनुपर्ने विश्वकर्माको भनाइ छ।
सरकारले भाद्र २७ गते संसदमा दर्ता गरेको विद्यालय शिक्षा विधेयकको विरोधमा शिक्षकहरुले बुधबारदेखि काठमाडौं केन्द्रित सडक आन्दोलन गर्दै आएका छन्। शिक्षकको आन्दोलनका कारण २७ हजार सामुदायिक विद्यालयका साढे ५३ लाख विद्यार्थी पठनपाठनबाट वञ्चित भएका छन्।
शिक्षकहरुले स्थानीय तह मातहत बस्न अस्वीकार गर्दै पेसागत हकहित, सुरक्षा र सम्मानका माग अघि सारेका छन्। सरकार र शिक्षकहरुबीच बिहीबार बैठक बसेको थियो। बैठक बसे पनि निश्कर्ष भने निस्किएन। ३ दिन देखि आन्दोलनरत शिक्षकहरुले वार्ता समिति गठन गर्न नसक्दा शुक्रबार बस्ने भनिएको वार्ता बस्न सकिरहेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765528419.png)
-1763721444.png)
-1765273665.jpg)
