काठमाडौं– काठमाडौंको थापाथलीमा रहेको परोपकार प्रसूति तथा स्त्रीरोग अस्पातलको टिकट अब अनलाइनबाटै लिन सकिने भएको छ। ६४औं वार्षिकोत्सव मनाइरहेको अस्पतालले बुधबारदेखि लागू हुनेगरी अनलाइन टिकटको व्यवस्था सुरु गरिएको जनाएको छ।
अस्पतालले बुधबारदेखि अनलाइन टिकटका साथै थप एक–एक वटा बिलिङ र टिकट काउण्टर समेत सञ्चालनमा ल्याएको छ। स्त्रीरोग अस्पालले फार्मेसी काउण्टर समेत थप गरेको छ।
अस्पतालका निर्देशक श्रीप्रसाद अधिकारीले गरिबीको रेखामुनी रहेकाहरुको लागि स्त्रीरोग अस्पतालमा जनरलतर्फ ४५० शय्या निःशुल्क गरिएको बताए। उनले मुलुकको एकमात्र महिला स्वास्थ्यसम्बन्धी केन्द्रीय विशिष्टिकृत अस्पतालले स्वीकृत शय्या ४१४ भए पनि बिरामीको चापका कारण ४८९ शय्या सञ्चालन गरिएको बताए।
निर्देशक अधिकारीले गत आर्थिक वर्ष २०७९/०८० मा कुल ३४ हजार १८५ जना महिला बिरामी भर्ना भएकामा प्रसूतितर्फ २६ हजार ९४७ तथा स्त्री रोगतर्फ ५ हजार ४६ रहेको उल्लेख गरे।
उनले नवजात शिशु सघन उपचारतर्फ २ हजार १९२ र मातृ संघनतर्फ ४८३ भर्ना भएर उपचार पाएको दाबी गरे। निर्देशक अधिकारीले गत आर्थिक वर्षमा अस्पतालले बहिरंग सेवातर्फ १ लाख ८० हजार ८९० जना महिलाहरुले सेवा लिएको जानकारी दिए। प्रसूतिमा भर्ना भएका २६ हजार ९४७ मध्ये २४ हजार ६७२ जना गर्भवती महिलाको प्रसूति गराइएको जानकारी दिँदै उनले अस्पतालमा २४ हजार ९१५ जना शिशुको जन्म भएको बताए। अधिकारीका अनुसार २४ हजार ६७२ जना प्रसूति महिलामध्ये ९ हजार ८२१ जनाको शल्यक्रिया गरिएको थियो।
निर्देशक अधिकारीले स्त्रीरोगतर्फ गत आर्थिक वर्षमा २ हजार ९६४ जनाको शल्यक्रिया भएको जानकारी दिए। जसमध्ये २२३ जनाको दुरविन प्रविधि (लेप्रोस्कोपिक) र २ हजार ७२३ जनाको चिरफार प्रविधिबाट शल्यक्रिया गरेर उपाचार गरिएको उनले बताए।
गत आर्थिक वर्षमा १ हजार ७७९ जना महिलाले निःशुल्क सुरक्षित गर्भपतन सेवा लिएको अधिकारीले जानकारी दिए। स्त्रीरोग अस्पातल २०१६ साल भाद्र १० गते कृष्ण जन्माष्टमी दिनदेखि सञ्चालनमा आएको थियो। सञ्चालन हुँदा अस्पतालले ४० शय्याबाट सेवा सुरु गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
