सुर्खेत- चौकुने गाउँपालिकाको वडा नम्बर ५ स्थित रेक्चाका गोपालसिंह बिसी लगायत केही अगुवाले गाउँमा बिजुली निकाल्ने पहल गर्दा धेरैले पत्याएका थिएनन्।
केहीले त यतिसम्म भने कि, ‘पानीबाट पनि बत्ती बल्छ! यस्ता बुद्धि नभएकाहरुको पछि लागेर हुँदैन।’
गोपालसिंह बिसी, रमेश बिसी लगायत जलविद्युत आयोजना समितिका अगुवाहरुले यस्ता धेरै आलोचना झेलेर पनि करिब ७ वर्षपछि गत भदौ १७ गते गाउँ उज्यालो बनाउने सपना साकार बनाए।
रेक्चास्थित बेतखोलीबाट उनीहरुले बिजुली उत्पादन गरेपछि गाउँ नै झलमल भएको छ। करिब ८४ लाख लगानीमा २२ किलोवाट बिजुली उत्पादन भएको हो। ७ वर्षअघि सुरु भए पनि केही वर्षयता अलपत्र बनेको बेतखोली लघु जलविद्युत आयोजना चौकुने गाउँपालिकाको विशेष पहल र आर्थिक सहायतामा सम्पन्न भएको हो।
२०६८ सालमा आयोजना सुरु भए पनि ठेकेदार कम्पनीले काम बीचैमा छोडिदिएपछि काम अलपत्र बनेको थियो। यसबाहेक गाउँपालिकाकै अन्य वडाका जनप्रतिनिधिहरु समेत यस योजनामा सहमत नभएको स्थानीय बताउँछन्।
आइतबार चौकुने गाउँपालिकाका अध्यक्ष धीरबहादुर शाहीले बिजुली उद्घाटन गर्दै स्थानीय सरकार गठनपछि स्थानीय सरकारको पहलमा कर्णालीकै पहिलो लघु जलविद्युत आयोजना भएको बताए। सो कार्यक्रममा स्थानीय खुसीले नाचेका थिए।
शाहीका अनुसार रेक्चामा ठेकेदार कम्पनीले अलपत्र पारेर छोडेको लघु जलविद्युत आयोजनालाई गाउँपालिकाको निरन्तर प्रयासमा काम सम्पन्न गराइएको हो। गाउँपालिकाको उज्यालो चौकुने अभियान अन्तरगत रेक्चामा अलपत्र रहेको बिजुली उत्पादनको काम सम्भव भएको बताइएको छ। उक्त अभियान अन्तरगत गाउँपालिकाले ३० लाखको हाराहारीमा रकम अनुदान दिएको छ।
उक्त आयोजनामा गाउँपालिका र स्थानीय साथै वैकल्पिक ऊर्जा प्रवर्द्धन केन्द्रको पनि लगानी छ। आयोजनाबाट करिब १ सय ५० घर परिवार लाभान्वित भएका छन्।
‘यति दुर्गम गाउँमा पनि बिजुली कसरी बल्ला र पत्यार नै लागेको थिएन,’ स्थानीय सुशीला रानाले भनिन्, ‘अब हामी पनि उज्यालोमा बस्न पाइने भयो। यसैमा खुसी लागेको छ।’
रेक्चा गाउँमै जन्मेर हुर्केकाहरु मन्त्री तथा उच्च पदस्थ कर्मचारी बनिसक्दा समेत गाउँमा बिजुली, बाटो, खानेपानीको लागि पहल नगरिदिँदा स्थानीयहरु रुष्ट बन्दै आएका थिए। अन्ततः चौकुने गाउँपालिकाले पश्चिम सुर्खेतको दुर्गम गाउँ रेक्चामा बिजुलीमार्फत खानेपानी ल्याउने तयारी गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771572939.png)
-1771566457.png)
-1764146706.png)
