घनश्याम भुसालको टिप्पणी– ओलीको उदयसँगै घृणाको राजनीति सुरु भयो

राजनीति

नेपाल लाइभ शुक्रबार, भदौ ८, २०८० १८:३६

काठमाडौं– नेकपा एकीकृत समाजवादीका महासचिव घनश्याम भुसालले नेकपा एमालेका अध्यक्ष केपी शर्मा ओलीले घृणाको राजनीति गरेको आरोप लगाएका छन्। ओलीको राजनीतिक उदयसँगै राजनीतिमा घृणा शुरु भएको भुसालको टिप्पणी छ।

शुक्रबार काठमाडौंमा आयोजित एक कार्यक्रमलाई सम्बोधन गर्दै भुसालले राजनीतिमा ओलीको उदयसँगै निन्दा, खुट्टा तानातान, भर्त्सना र गालीको परम्परा र संस्कृति हाबी हुँदै गएको उल्लेख गरे। नयाँ पार्टीहरुप्रति लक्षित गर्दै भुसालले अहिले ओलीभन्दा पनि १० हातमाथि गएर निन्दा, भर्त्सनामा उत्रिनेहरु आएको उल्लेख गरे।

भुसालले ओलीका कारण नेपालको शिक्षामा हुनुपर्ने उल्लेख्य प्रगति हुन नसकेको आरोप समेत लगाए। ओलीका कारण वाम आन्दोलनको सबै सम्भावना टुटेको समेत भुसालले आरोप लगाए।

भुसालले भने, ‘राजनीतिमा जब हाम्रो ओली कमरेडको उदय सुरु भयो, त्यसपछि नेपालको राजनीतिमा घृणाको, निन्दाको, खुट्टा तानातानको, भर्त्सनाको, गालीको यो एउटा परम्परा, संस्कृति हुँदै गयो। अहिले त ओलीजीभन्दा १० हात अघि गएर निन्दा भर्त्सनामा अरु नै आइपुगे। त्यो निन्दा, भर्त्सनाको बुढो प्रतिनिधिको ठाउँमा नयाँ प्रतिनिधि आए, जवान प्रतिनिधिहरु आए। ओलीले जे गर्नुभयो, त्यसको लागि १५ वर्ष हामीले हाम्रा विद्यार्थीहरुलाई पढाउनुपर्छ। नेपालले के गुमायो भन्दा शिक्षाका क्षेत्रमा मात्रै १० वर्षमा भइसक्ने, ५ वर्षमा भइसक्ने हाम्रो सार्वजनिक शिक्षा गुणस्तरीय भइसक्ने निजी र सार्वजनिक शिक्षाको विभेद हटिसकेको हुने र सबै नेपालीले ख्याल गर्नुहोला। यो नारा सबैलाई शिक्षा र गुणस्तरीय शिक्षा हुने थियो। त्यो अवसर ओलीजीका कारणले, ओलीको प्रवृत्तिको कारणले नेपाली राजनीतिमा, नेपाली वाम आन्दोलनमा पसेको ओली प्रवृत्तिका कारणले सम्भावना टुटेको छ। ओलीजीका कारणले नेकपा एमाले झनै संकटग्रस्त बन्दैछ। संकटग्रस्तलाई पार्टीभित्र बस्न अझ बढी ओलीको भक्ति चाहिन्छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

दुर्घटनामा परेकाको निःशुल्क उपचार गर्न माग

'बीवाईडी हाई–टेक विक २०२५' हुँदै

काठमाडौं महानगर सहित देशभर प्रमुख प्रशासकीय अधिकृत नपठाएको भन्दै सांसद शाहीको आपत्ति